(from Yahoo Blog)
2012年7月21日
錯! 錯! 錯! 揀錯咗地方添~
今日巡視咗兩個場, 一個係順利商場, 另一個係順安商場, 兩個場都冇冷氣。
個天作打風, 翳焗到不得了, 天文台話有34℃, 熱到死咁滯。
時代唔同喇, 今時今日嘅商場想做多D生意, 冷氣同扶手電梯都已經係必須嘅配套。唉, 下次都咪制咯!
未嚟之前諗住個場有成30幾萬呎, 應該會有好多舖頭, 嚟到睇吓, 原來好大比例面積都要晒嚟做護老院。
整體嚟講, 商場嘅生意又唔算太淡靜, 都OK啦, 而且仲有好多舊式舖頭仔添, 應該都幾啱嗰D鍾意玩懷舊嘅後生仔。
由新光戲院搭619隧巴 (分段收費$9.3) 直到順利邨總站, 但係回程要俾全費$9.8。
順利商場 (地址：觀塘利安道15號), 面積336,900呎, 大概係1980年落成, 樓齡32年, 未做資產提升工程
順利商場美其名話叫做商場, 但係 "商場" 嘅定義同呢個年代好唔同, 其實所有舖頭都係分佈於幾座公屋樓下, 又冇冷氣, 熱到我死咁滯。行到身水身汗, 我卒之都明白點解D人話舊屋邨有人情「味」喇!
領匯只係加裝咗D指示牌, 同埋商戶指南, 其他野都保持住 "原汁原味" (利溢樓)
吖! 領匯翻新咗D公廁 (利康樓3樓)
有兩條扶手電梯, 上落唔使撐樓梯, 已經算係咁
連接利康樓與利溢樓之間通道的上蓋
地下有個街市
呢類舊式舖頭仔, 喺順利邨多到唔恨。萬興泰糧食公司 (利溢樓3樓E12號舖)
呢邊又有幾間。見唔見左手邊橙色衫黑色裙嗰位阿姑, 我巡視業務時除咗會觀察商戶嘅表現, 仲會睇埋領匯職員嘅工作情況, 昅吓有冇人躲懶吖嘛! 呢一截人流最多, 所以D商戶都幾好生意, 亦秉承咗房署年代嘅傳統, D商戶慣咗將D貨擺出嚟, 阻鬼住晒條路。呢位阿姑就要不斷勸籲D商戶擺番埋D, 於是乎我就一路睇住阿姑嘅工作表現嘞~
又係賣糧油雜貨嘅舖頭仔 (和興隆糧食．利業樓3樓D03號舖)。即將失去, 才會珍惜...
時代變遷, 有誰可以敵過歷史的洪流, 和興隆隔籬呢個吉舖以前係一間辦館 (前新昌辦館．利業樓3樓D02號舖．742呎)
行咗過去利康樓。景生珠寶金行 (利康樓3樓P11號舖) 外
鴻雋地產 (利康樓3樓G03號舖) 外
幾好粉麵茶餐廳 (2樓CA01號舖) 緊靠住萬寧/惠康, 人流有一定保證。所以呢, 地產霸權唔一定要「反」嘅, 可以善加利用架嘛!
大家樂 (利康樓2樓ER1號舖) 呢個位都幾吊腳, 如果唔係以大家樂本身嘅號召力, 普通餐廳仔應該唔慌做得長
順利商場二期, 前身係戲院, 現為護老院
利康樓地下零零仃仃有間存記餐廳小廚 (利康樓地下G16-17號舖)
巡得八八九九, 喺門外見個Cashier咁鬼cute, 所以入咗嚟幫襯, 順便避暑 (愛群快餐店．利溢樓3樓E8-E9號舖)
順利邨巴士總站旁。臨走時都要講多兩句......喺房署年代, 只要係有人流, 呢類通道都會被小販佔據, 房署又闊佬懶理, 霸吓霸吓, 就會變成梗檔, 跟住就「逆權侵佔」, 以後都趕佢唔扯, 呢D就係最乞我憎嘅「小販霸權」嘞!
下一站係順安商場...
＊＊＊
沒有留言:
張貼留言