巡視業務．領匯．大元商場 @2012-07-28

(from Yahoo Blog)

2012年7月28日

大元街市重新裝修之後, 喺報章電視就見得多, 好想嚟現場感受吓!

個街市可以用八通嘟買野, 不過檔戶或者顧客都似乎仲未適應, 唔似得喺M記咁多人用。個人覺得辛尼哥哥想推廣街市八通嘟, 可以教D檔戶喺收錢時問聲：「請問嘟卡定俾現金呀!」順口提一提, 已經可以提高個使用量。

領匯有自知之明, 衡量過大元商場無論點整都唔夠大埔超級城撼, 所以將大元商場資產提升工程嘅重點放喺個街市度。

如果要感性D講, 我覺得今次大元街市「結構性改革」, 係香港街市發展史嘅重要里程碑, 會迫使食環署街市都要為市民提供更優質嘅環境及服務, 希望有朝一日, 政府街市都可以乾乾淨淨, 企企理理。阿門!

講少少題外話, 辛尼哥哥加入八達嘟之前, 係某家銀行嘅高層, 佢喺「雷曼毒債」毒發前毅然劈炮唔撈, 有傳聞話當時有人先知先覺, 聞到燶味, 想拯救一班矇查查客戶, 但係鬥唔過其他後知後覺的高層, 而被下野了。(聲明：我冇內幕消息, 以上只屬江湖傳聞, 純粹係聽番嚟, 冇憑冇據架!) 所以我覺得辛尼哥哥係忠嘅 , 我撐你! 我會用多D八達嘟架喇! hehe~~

交通安排：隧巴118轉九巴72X去大埔中心總站 ($9.8+$ 9.1); 回程：九巴72X轉隧巴118 ($9.1+$9.3) 

大元商場 (地址：大埔汀角路10號), 1980年落成, 面積231,100呎。喺大埔中心總站落咗車, 四圍望, 隱隱約約見到大元商場個招牌

大元商場資產提升工程嘅重點係大元街市

街市內幾條主要通道, 以顏色分辨, 有點「五常法」的神髓

想搵心儀檔口, 但係又唔熟地頭? 唔怕, 頭頂有幾個「 馬利奧金幣」, 就係代表每一行通道, 唔識字就認顏色啦! 如果係文盲+色盲+GPS系統失效的方向盲 (咁嚴重殘障, 都幾慘吓喎), 你可以搵駐場「服務大使」幫手, 嗰幾位姨姨應該會幫到你

因為街市翻新後, 環境好咗, 牛肉檔雄才肉食公司 (109號檔) 的第二代願意接班, 亦成為大元街市的另類焦點, 事關接班人係一對年輕姊妹花呀! 可能係自小耳濡目染嘅關係, 小姊妹對牛的每個部位都瞭如指掌, 耐心解說, 同粗聲粗氣的街市佬形象大相逕庭

榮華雞鵝鴨 (117號檔) 係其中一檔活家禽檔

嚟之前做過功課, 網上有人話英記粉麵 (206號檔) 嘅傳統糕點唔錯, 於是買咗件糯米糍 ($3.5) & 以雞屎藤做的清明仔 ($5) 試吓, 俾完錢, 一路食一路繼續巡視業務。弊!! 唔記得用八達通添~

上一期iMoney有記者訪問過家樂鮮花爬蟲水族館 (209號檔), 你估吓佢有咩講? 嘉樂仔話, 街市裝修完之後, 冇得瞓晏覺! 留意, 係「冇得瞓」, 唔係「瞓唔著」呀! 想知點解? 佢話因為生意好咗, 依家唔得閒瞓晏覺咯喎! 佢仲好open咁同個記者講, 話每日起碼多咗千幾銀生意, 咦! 咁咪即係座底每個月多3萬幾銀!? 恭喜你, 恭喜你, 恭喜你生意興隆, 貨如輪轉, 遲早喺其他領匯街市開分店, 做大佢!!

呢幾間賣服飾嘅, 分別係麗麗時裝百貨 (315號檔), 小朋友 (317號檔), 欣泰精品百貨 (222號檔)。大元街市嘅設計就係咁四通八達, 檔檔單邊

iMoney記者都有訪問過阿里山烤雞 (306號檔) 個檔主。我超鍾意佢嘅回應, 所以特登嚟幫襯佢, 以作鼓勵, 今次記得用八達通喇! 嘟一嘟, 搞掂!

好唔好生意係有樣睇架! 冇得呃人! 厚興瑜記 (118號檔) 賣手撕雞, 睇落都幾對版, 於是買半隻返屋企加餸。我攞定張八達通俾錢, 點不知阿姐話佢地冇得嘟喎, 搞到我霎時間要擒擒青摷散紙, 排我後面嗰位阿姑仲用眼神鄙視我, 嫌我唔一早拎定錢添 ><" (後話：事前唔知厚興瑜記係乜野來頭, 食完晒之後, 上網check吓......哦, 失覺晒! 失覺晒!)

759阿信屋 (415, 417, 419, 421號檔) 大元新店喺4號通道, 呢間分店嘅裝修比其他舊分店加添咗少少時尚感

行行吓, 見有位阿姐推住個綠色大箱, 我即刻跟住佢尾睇吓啦。阿姐唔係收垃圾, 而係收番檔販嘅菜頭菜尾, 有機廢料之類去做肥料。眼見D檔販都自動自覺, 非常合作, 我都老懷安慰咯

街市內的裝飾 (潮興美食．308號檔外)

呢度都有 (莉記花店．302號檔外)

方便D街坊睇時間返屋企煮飯, 近出口有個掛牆鐘, 幾設想周到

講到設想周到, 就不得不提呢個「多用途空間」(個名係我作架)。買完餸想洗手, 有洗手盆; 口渴咩? 有飲品機; 行到攰? 有凳仔歇吓腳; 驚人呃秤咩? 有公磅; 無聊呀? 有電視睇喎~

大元街市對面係翠屏商場, 我都有用快速搜畫模式睇過, 樓上好大朕跌打酒味, 樓下係祥興集團嘅天下。忽然灑咗一場失魂雨, 祥興的客仔散去了, 紛紛走入大元街市, 見到呢個情景, 我竟然偷笑喎, 真衰!

巡完個街市, 準備搭扶手電梯上平台。見呢對扶手梯, 落嘅人多, 上嘅人少, 心覺不妙...

街市天台被打造成美食廣場, 有十幾間平民食肆, 任君選擇

天台有小型兒童遊樂場, 仲有個小型種植場。食肆顧客可以一邊食野, 一邊欣賞呢個綠田園view, 都幾爽!

個小型種植場嘅肥料, 就係用由商戶收集番嚟嘅廚餘做架嘞

原來呢度有條扶手電梯, 可以通去天台美食廣場。唔怪得之啦!

大元邨仲有好多舊式舖頭仔, 絕對係喜歡懷舊嘅朋友的恩物, 可以近距離接觸吓舊屋邨的人情味。記住呀, 想舖頭仔有得留低, 要靠各位鼎力支持架! 有嘅時候去珍惜, 總好過冇咗至嚟可惜吧! 

呢度仲有

要乜有乜, 髮廊啦, 醫務所啦, 仲有校服舖。呢間龍園校服 (泰德樓地下115號舖), 上次去太和廣場咪見過!?

維多利校服 (泰榮樓地下3號舖) 外

咦! 又見到漁灣村 (泰民樓地下5-7號舖)

長者理髮$25, 價錢同柴灣永利中心D超蚊型舖頭一樣, 但係呢度嘅地方就大到起碼開到幾圍麻雀咯~ (亞萍理髮．泰民樓地下1號舖)

＊＊＊

領匯官方網頁對大元商場資產提升工程(AEI)的描述：

領匯於2010年展開首個鮮活街市優化項目 – 大埔大元街市優化工程已全部完成。優化後的大元街市展現了21世紀鮮活街市的嶄新設計及營運模式，實踐一條龍環保概念，全新開揚佈局，多元化商戶進駐，為區內居民帶來生活新體驗，還成功吸納年輕一代新客源。大元街市更憑此優化工程獲頒亞洲管理學會主辦的「亞洲企業社會責任卓越環保大獎2011」，印證工程的成功，也成為傳統鮮活街市的新典範。

第248期 iMoney 第18頁。我就係見佢兩個諗野咁正面, 所以今日特登嚟大元街市支持吓, 奸爸爹!!

後記：見我今次寫到咁長, 都應該睇得出我對大元街市「有好感」。我認呀, 大元街市的確值得一去再去, 我仲有好多檔未幫襯過, 下次會再嚟。I'll be back...

＊＊＊

　巡視日程表