麗港城商場 名花有主

(from Yahoo Blog)
2012年7月6日下午5:07｜公開｜累積瀏覽 303

麗港城商場賣盤一事, 已有定案, 新主人係里昂基金。

前些時, 市場已經盛傳領匯有意洽購麗港城商場, 但係後尾又冇晒聲氣。近幾日, 再傳出有基金收購麗港城商場, 直覺上已經覺得新買家係領匯嘅可能性好低。

麗港城商場每月租金收入約5百萬, 以今次的成交價15億嚟計, 年息率啱啱好係4厘。作為領匯基金持有人, 如果可以多D收人, 我當然係歡迎之至啦!

之不過, 私人商場能提供「再改善」的空間, 一定比房委會的爛商場少好多。若果上手業主叫價過高, 我都唔贊成領匯「係又買, 唔係又買」。

而且, 論到協同效應, 麗港城自成一角, 同啟田嗰邊又唔係咁啱路, 都唔知點協同?

再講吖, 係人都知領匯想買野, 我都唔想D人以為領匯志在必得, 而推高個價。所以, 今次買唔買到, 我覺得都冇乜所謂。

再講長遠D, 里昂買入嘅目的, 都係為咗租金收益, 同埋潛在的資產增值可能 (當然亦可能係貶值啦), 隨時都會賣番出嚟, 唔似得領匯咁, 會長期持有, 更值得揼本落去, 慢慢執好個場。

我有的是時間, 就等下次股災, 里昂等錢使嗰陣, 鑒平鑒賤賣俾領匯囉!

「發夢冇咁早! 早D抖啦!」哎呀, 我俾心魔鬧喇...