心理質素．小商戶的出路

(from Yahoo Blog)
2012年7月19日下午6:41｜公開｜累積瀏覽 507

早前有間基金公司呢頭以$28.7沽出領匯冇耐, 轉頭又以32蚊買番, 唔知佢係咪計錯數 (反正都係OPM, 基金公司唔會有損失), 但係呢個動作就俾缸湖中人笑到面黃。

持股要講心理質素, 揸領匯更加要笑罵由人。見過有位Blog友買咗領匯之後俾朋友鬧, 後尾喺朋輩壓力之下沽番出嚟; 又有位Blog友都揸咗一段頗長時間, 原本以為佢係同道中人, 同樣對領匯鍾愛有加, 認同呢間公司嘅理念, 殊不知上次全城插爆「尋老味」項目時, 連佢都頂唔住嗰種「 紅衛兵」式的攻擊, 心理上承受唔到, 而全數沽出, 悄然引退了。

我唔識技術分析, 又唔識得睇年報, 到今時今日仲揸住領匯, 全靠認同佢背後嘅理念, 亦親身體驗到佢執行嘅成果。

有話領匯逼走小商戶, 我有「主流民意」以外的體會, 我始終認為業主與租客的關係是唇齒相依的。小商戶係領匯的重要資產, 以我的觀察, 領匯係有心扶持他們的 (只不過有D係爛泥扶唔上壁, 死都唔肯順勢而行罷了)。領匯已經接手咗公屋商場6年幾了, 經營方針亦明顯不過, 亦從來冇隱瞞過要為股東尋求利益呢個目標, 房署的舊商戶理應有足夠時間去調較心態, 以至調整經營策略。唔怕得罪講句吖, 用6年幾時間都適應唔到轉變, 咁就唔好學人做生意咯!

「合則來, 不合則去」, 做人如是, 做生意亦如是。如果那撮小商戶仍舊依戀著房署年代的「Hea」, 想霸住個舖位過日辰, 美其名話只求安穩嗰隻, 佢地係有足夠時間另覓棲身之所的。房署手頭上仲有好多空置舖位等緊人租, 仲有食環署街市嗰D空置檔位呢! 呢D政府部門用嘅係公帑, 佢地唔介意收少D租, 個班不思進取 (要咁樣形容佢地, 唔好意思) 嘅商戶大可以鳥過枝頭架嘛! 良禽擇木而棲, 好正常啫, 做乜要喊苦喊忽, 死黐住領匯, 賴死唔走啫!? 同佢有親咩!?

寫網誌已有一段日子, 我成日喺呢度踩房署, 又為領匯說好話, 寫到今時今刻都仲未俾人插 (可能因為冇人睇), 已算萬幸。慶幸香港還有言論自由, 善哉! 善哉!

後記：做生意絕對係一種高風險行為, 比投資股票高出不知多少倍, 尤其是係家爺仔乸一齊落場做嗰D生意仔, 風險太集中, 檔生意稍有閃失, 就冚副家產都受影響, 所以我將呢篇網誌歸類於《投資．風險》。


(免責聲明：投資有風險，自己衡量，唔好跟人)