家爺仔乸的生​意

(from Yahoo Blog)

2011年5月31日下午6:06｜公開｜累積瀏覽 190

噚日提起「興華廣場」嗰間藥房仔, blog友 feifei 的回應帶出一個point, 係我曾經都諗過嘅。領匯商場, 有好多都係家爺仔乸的小生意, 亦加入咗不少超市、連鎖店, 作為消費者嚟講, 引進有品牌的公司 (有品牌唔等於名牌呀吓!) 到自己屋邨, 我係無任歡迎的。

至於那些小生意就沒有生存空間嗎? 我的想法是「否定」的, 正所謂「咸魚白菜, 各有所愛」, 小商戶的優勢係應變能力高, 直接了解到當區居民的需要, 這點是大公司點學都學唔到的。

可是, 坊間依然有相當數量的小商戶, 諗住自己做咗幾十年生意, 食鹽多過你食米, 又或者自己都仔大女大咯, 個個出晒身, 檔野都係要嚟過日辰。(咁冇理由為咗你要霸住個舖位過日辰, 而收窄咗居民嘅選擇範圍架?) 呢類商戶都係唔會再變, 唔再裝修, 唔試新貨, 賣開個樣就個樣, 甚至乎一路都係賣緊以前入落D存貨。我唔點名講邊間吖, 柴灣區有商戶依家仲係賣緊「火水爐」, 咁你一年會幫襯佢買幾多個火水爐吖? 俾你買到個爐, 都搵唔到地方買火水啦! 你唔去幫襯, 佢冇生意, 到佢做唔住要拉閘時, D人又話D火水爐係佢地嘅集體回憶, 又話好掛住D舖頭仔喎, 跟住又狂數領匯幾咁冇良, 迫走佢地。喂, 如果你咁鍾意鋪頭仔/集體回憶呢D咁嘅野, 依家就 "拿拿淋" 快D身體力行, 用真金白銀去買多幾個火水爐、駱駝牌暖水壺、瓷器花樽..., 如果唔係, 佢真係唔知頂得幾耐架?!

老實講, 好多人都係得把口, 口口聲聲話要小商戶「有得留底」, 但係到去使錢消費時, 咪又係跑去大商場、靚商場、潮商場, 用銀紙來投票...。好嘞, 血拼完一大輪之後, 又跟D呃稿費嘅記者仔/記者妹話D領匯商場冇特色, 好似倒模咁喎, 服未? 一時又冇良, 一時又霸權, 乜都噏得餐, 尤其是嗰幾份主流報紙, 同埋專執人口水尾嘅「東張西望」, D師奶仔就最鍾意跟住噏當秘笈架嘞~