上樑不正下樑歪

(from Yahoo Blog)

 

2012年9月7日下午5:06｜公開｜累積瀏覽 180

 

仲有一個星期, 就係金融海嘯４週年。

四年前的中秋佳節前夕, 風雲驟變, 令我一下子成為雷曼苦主的一員。

 

星展銀行發行嘅Constellation債券係同雷曼有關 (裡面總共有８間公司, 雷曼只係其中之１間), 2008-09-14 的晚上, 心裡忐忑不安, 並作出最壞打算, 要蝕去８份之１本金, 但係勢估唔到咁大鑊, 原來星展D所謂「債券」, 係會因為８間裡面, 是但１間執笠, 而變成「渣都冇」, 即係要 TOTAL LOSS !!

 

事隔四年, 今日再講番雷曼呢壇野, 已經唔會有人有興趣, 但係呢件事教曉咗我,「唔可以信銀行」。自此之後, 我收錄咗一D銀行違規、銀行呃人、銀行出錯、職員監守自盜、偷戶口錢嘅報導, 好等有緣人睇到之後, 引以為鑑。當然,「同檯食飯, 各自修行」, 你睇完可能會覺得人地蠢啫, 自己唔會咁笨嘅。都冇所謂啦, 信不信由你, 我提過你, 我都已經心安理得。

 

嗰次嘅經驗, 對我來說是刻骨銘心的, 當時, D錢冇晒, 仲要俾人奚落。由被社會大眾譏笑, 呢班盲毛「貪心」、「抵死」、「輸打贏要」, 到星展銀行後來被監管機構捉到痛腳, 死死地氣賠錢了事。

 

期間Amy Ip葉約德女士, 公然喺立法會扮失憶, 接受立法會質詢時, 到某D位就答「唔記得」, 因而被警告：「......講大話, 你要坐監架」, 佢問完律師之後都係答「唔記得」, 但係又奈佢唔何喎。一位揹住「打大鱷英雌」英名的銀行高層, 誠信表現尚且如此, 更何況佢手下D馬仔呢? 為咗跑數, 為咗自保, 有乜野做唔出吖! 同我有10冤9仇嗰個銀行Sales, 依家仲日日喺銀行返緊工, 繼續o氹存戶落沓, 我戥嗰D人牙煙咋!

 

我唔係嬲佢叫我買星展債券 (其實已經賠番晒有突), 我係爂佢做咗D唔見得光嘅野, 到東窗事發, 就講大話掩飾! 明知佢係講大話, 我又奈佢唔何! 佢咁冇誠信, 叫我以後點信佢??

 

銀行存戶一般都會對銀行信任有加, 入到銀行裡面, 介心都會減低。唔好以為雷曼之後, 樣樣野要錄音, 就叫「採取措施保障存戶」, 你呃我膝頭哥唔食辣椒醬咩!!

 

 

網上圖片, 時為2010年6月