(from Yahoo Blog)
2012年8月11日下午5:58｜公開｜累積瀏覽 828
巡完元州商場, 跟住就過對面馬路, 巡埋第2站嘅幸福商場。
一早知道呢個場好細, 得3萬幾呎, 而且位置冇咁好, 預咗冇元州街嗰邊咁旺, 所以事前對佢完全冇期望。
「冇期望就唔會有失望」, 仲竟然驚喜一浪接一浪。
幸福商場 (地址：長沙灣幸祥街8號), 2001年落成, 面積38,700呎
經長沙灣港鐵站行人隧道過馬路, 一出就見
先喺外圍兜咗一個圈, 發覺外牆非常之乾淨
之後行入商場, 全完唔覺得似公屋商場
踏入門口呢一刻, 我覺得似將軍澳海悅豪園嘅格局
樓底夠高, 令到賓墟茶餐廳 (G02號舖) 好有戶外茶座feel
咁細個場, 都竟然有兩間藥房。生裕隆大藥行 (G03號舖) 係其中一間
冇諗過公屋商場會有高爾夫球用品專門店 (Golf Performance Centre．G12號舖)
仲唔止一間 (必達高爾夫專賣店．G6 & G14號舖)
大包圍的「新豐中西藥參茸海味雜貨」(G08號舖), 中西藥、參茸海味、雜貨, 包辦晒
售賣街頭小食的包餃店, 雖然係街坊式小店, 但係唔經唔覺, 已經發展成chain store, 要用物流車隊派貨咯! (包餃店．G11號舖外攝)
準備上樓上喇~
上咗樓上。地茂粥麵小廚 (109號舖), 小西灣人應該唔會陌生。呢間比小西灣店優勝嘅地方, 係可以盡覽長沙灣遊樂場, 冇遮冇擋, 非常開揚
除咗樓下有兩間高爾夫球用品店, 原來樓上仲有間滾軸溜冰用品專品店Pro Skate (103號舖), 真係估你唔到!
行入少少, 係君日餐廳 (108號舖)。同「地茂」一樣, 有幅玻璃大窗, 可以飽覽開揚球場景, 以街坊價錢, 有如此享受, 仲想點呀!
好唔忿氣, 所以不得不再提 "三文治餐" 定價嗰壇野。呢度有晒冷氣, 有景觀, 有裝修, 地方企企理理, 一個三文治餐訂價18大元正, 單/雙併同價。仲記得我上次 (2012-04-21) 去房署旗下嘅白田商場嗎? 嗰度冇冷氣, 地方踎踎兜兜 , 租金喪平, 但係三文治餐單併19蚊, 雙併仲要收21蚊添, 你話係咪食人唔o累骨吖!? 我都話平租唔代表會益到D居民架啦! 房署不如收番市值租, 直接將D錢回饋公屋居民仲實際啦!
個場唔大, 好快睇晒, 依家走喇~
幸福商場外觀。
臨返柴灣之前, 順路過去麗閣瞄一瞄, 見原本吉晒嘅2樓 & 3樓, 俾YWCA租咗嚟做Training Centre。對呢類團體, 雖然只會收取特惠租金, 但係多咗人出出入入, 地碼對樓下商戶 (尤其是個街市) 生意會有幫助, 畢竟係好事一樁。
＊＊＊
沒有留言:
張貼留言