(from Yahoo Blog)
2012年8月18日
寶達邨地理位置上自成一角, 寶達商場位於達祥樓下底, 提供全邨共13幢樓嘅居民起居生活所需。
開邨只有10年, 寶達屬於年輕力壯型, 商場內沒有那些坊間忽然饑渴的屋邨老店, 邨內「幼兒園」與「 護老院」的分佈比例, 幼兒園仍以大比數勝出。但係我發覺一個現象, 唔知點解呢條邨寧舍多「馬蘭奴」, 仲要係極之悠閒嗰隻。
商場內人流量雖不至於話澎湃, 但係以「街坊場」級數嚟講, 已屬合格有餘。可能係地勢的局限, 選擇留喺邨內打發時間嘅街坊, 實在為數不少, 而商場亦順理成章成為佢地消磨時間的好去處。鄰近入伙不久的秀茂坪南邨, 亦為寶達商場提供了新動力。
至於物價方面, 由於寶達係領匯場, 都預咗係租貴, 如果依照坊間嘅 "租貴 = 高物價" 理論, 又似乎apply唔到喺寶達, 我平時慣用嘅格價指標, 都顯示出呢度D野寧舍平, 下面會有幾個例子, 大家可以參考吓。
是日交通工具：港鐵柴灣站→藍田站→專線71A
寶達商場 (地址：秀茂坪寶琳路2號), 面積132,500呎, 於2002年開始啟用
專線小巴71A總站, 正是寶達商場
嘩! 爛蓉蓉咁, 點見得人架!?
落咗車。昏昏黃黃的運輸交匯處內, 有個商場入口
一入去係商場2樓 (創興銀行．203B-204號舖外), 商場以紅白藍三色作為主要色系。呢層得幾間舖, 最篤篤有間麥當勞 (206號舖), 旁邊有行人天橋通往附近住宅
其實大部份舖頭都集中喺一樓, 我一路順住舖頭冧把逐間巡。巡到呢度覺得怪怪地, 唔係好明呢度想做乜? (新德一線電業公司．105號舖側)
街坊價, $64洗剪恤 (潮棧．107號舖)
一間幾吸引到我眼球嘅舖頭, 櫥窗內擺滿各式洋酒 & 國酒的「水の源」(108號舖), 舖內有多款零食出售, 但主力係售賣各類飲品, 包括酒精飲品。頭先咪話過呢條邨有好多麻甩佬嘅, 佢地為水の源提供咗穩定嘅客源
水の源內的貨架。九江雙蒸, 竹葉青酒, 紅雙喜香煙, 啤酒.....等, 正是那群悠閒麻甩佬的至愛
水の源對面, 係一間我一直認定佢係連鎖式經營, 而又貌似街坊的鞋店 (高威皮鞋手袋公司．109號舖)
依家坊間忽然寵愛街坊文具舖, 我都順應潮流, 影俾大家睇吓。(右) 寶怡文具玩具公司 (110號舖), (左) 美明洗衣店 (112號舖)
經常幫襯德馨苑柴灣店, 查實寶達店至係德馨苑嘅發源地 (德馨苑海鮮酒家．114號舖)
有老麥, 又有上校, 可以俾街坊多一個選擇 (KFC．115號舖)。當然, 有好多自命有taste嘅人, 係睇唔起呢類連鎖快餐店, 但係一個街坊商場能吸引多間連鎖集團嚟插旗, 正是人流量的象徵。再講, 連鎖集團有能力將規模效益發揮得更加好, 所以, 訂價亦會更加貼近街坊的消費能力
街坊版冒險樂園——快樂城 (117號舖), 隔籬係百佳超級廣場 (116號舖), 全邨有13座咁多, 足以養到一間超級廣場
領匯寶達商場辦事處 (118號舖) 竟然霸喺個商場中間, 地方又闊落, 做乜咁嘥料呢? 快D騰番個位出嚟租俾人, 等我收番多D租啦!
亞洲國際餐飲集團旗下的百份百餐廳 (121-122號舖) 新開張冇幾耐, 亦係全場最sharp嗰間。好旺場, 即是話, 街坊是受落的
巡完一樓, 依家落咗地下嗰層
顧客服務台設於地下
李家園中西藥行 (16號舖), 個名好鬼熟。吖! 我醒起喇, 小西灣富怡花園嗰間
商人會不斷測試市場嘅購買力, "市場" 發出訊號, 話承受唔到抵記加1蚊, 咁唯有以不同藉口賣番$7.8啦! (抵記$8.8百貨．5號舖)
又係話「租約期滿結束營業」? 唔通有咁啱得咁蹺, 全線都一齊租約到期? (ego;．6號舖)
JP House速剪 (9號舖) 一割引九折, 實收$45
兩間藥房, 各據一方, 招牌款式同出一徹, 我好難唔懷疑你地根本係同一幫人架喎! (保民藥房．8號舖)
寶達街市都係喺地下嗰層。門口第一檔, 三文治餐單拼$14, 雙拼$16 (烘底不另收費), 絕對係低於平均值 (新興車仔麵．街市26號檔)
街市承包商 "利揚" 於2011-05-01開始接手。經我今日目測估算, 街市出租率超過九成, 街市貨品一應俱全, 完全可以滿足到居民日常需要。查實寶達街市係有過一段黑暗的歲月的, 翻查過資料, 2003年曾經有承包商擘炮, 想交還經營權俾房委會, 當時經營環境非常困難, 房委會冇體恤不特止, 反而要求承包商先清場, 要趕晒D檔戶走。2003-04-21《 蘋果日報》形容寶達街市及商場係「人影都冇隻」架, 相當慘情。講完舊時D唔開心野嘞, 講番依家, 呢個門口直入, 有檔雞旦仔, 每底8蚊, 比呃綜援嗰位路霸雞旦仔伯父還要平宜。大家會唔會思考下, 點解擺街邊, 唔使交租嘅檔口, 仲會貴過領匯街市呢? 係咪俾人搵笨呢? 俾人呃咗D同情心呢?
出咗商場外睇吓~
"四方格" 係寶達邨嘅點綴圖案 (達康樓地下)
入番商場, 個招牌都係九宮格
曾經見報的櫃員機
一班大叔在大樹下乘涼, 寶達寧舍多呢D麻甩佬
搭扶手電梯上番2樓
麥記內。以球場為裝修主題, 陳設簡單, 沿用麥記的經典地磚, 新裝修的麥記要走時尚路線, 已經唔再用。留意吓收銀櫃台下面嘅圖案, 同達康樓的圖案係互相呼應架! (麥當勞．206號舖)
＊＊＊
沒有留言:
張貼留言