總瀏覽量

2017年5月5日 星期五

[剪報] 識得揀,一定做六星級商場 by 羅永康

呢位羅大哥寫得幾盞鬼, 文章內容又可以體會到823手足們的難處, 雖然不知能否完全反映到真實情況, 但好想同大家分享下。

 
《立場新聞》識得揀,一定做六星級商場 (原文連結)
  

識得揀,一定做六星級商場

喺物業管理群組,有師兄話做屋邨好過做高級盤,起碼有人情味啲,唔會事事追殺,對於我呢個入行超過廿年,清潔保安維修幾瓣都做過,同埋乜類型既盤都曾經踎過,管理同𡃁位都捱過嘅人,實在唔能夠苟同,我覺得識得揀,一定揀六星級商場嚟做。而家,我就比較下各類型場地面對嘅難處。

老老豆豆,任何行業,最最最麻煩,就係外行管內行,呢句係重要嘅廢話,做邊行都知。通常六星級商場,業權唔會分散,由地產集團分公司直接管理。蔡東豪分析劏場都話,商場管理係專門學問。樣樣嘢都有佢專業,蕃茄炒蛋都有學問,唔好睇到咁簡單,否則大學唔會有管理學系。

講返主題,私人屋苑同工廠大廈,多數業權分散,即使有專業管理公司,都要為咗下次投標,而唔敢立亂得罪法團。有錢唔代表專業,好多主席都唔清楚呢樣嘢,但你又唔得罪得佢哋,所以,唔好以為好容易。

屋邨有啲可以買賣,但唔好以為唔賣得,唔駛應付法團就冇事。唔好忘記,每條邨,每座樓都有名為互委會,實為鬥委會既人。每次開會,班友都嚟批鬥,仲要佢哋乜都唔識嘅。

唔好以為搞掂互委會或法團同埋物管就冇事,每個住宅,無論公私營,都總有區議員存在,即使俾你溝到佢成個辦事處所有人,但唔好忘記,區議員幾年選一次,政治上,個個議席都寸土必爭,其他派系會過嚟做地區工作爭地盤。即係話,你唔止要同三瓣人 deal ,仲有第四瓣人特登走埋嚟針對你,而且你想同佢打好關係都冇可能,因為人哋要爭選票。

到客人,唔好以為窮人一定體諒窮人,當佢哋係客人,一樣捽死你,何況而家香港怨氣大過天,民攻打民,國攻打國,臭臉之都,全球第一,非浪得虛名。屋邨同領匯級數商場多數基層客三個字:麻撚煩。一星價錢,要六星服務。留意,清潔唔同維修,枝燈著唔著,有標準,乾唔乾淨,冇定義。清潔唔滿意,連帶保安管理都俾人插。基層商場,遇到既客一樣,應該唔駛再多講。

高尚住宅同六星級商場,一般行嘅,起碼都中產,第一讀過吓書,比較講道理;第二,人哋有頭有臉,唔會喺條街開拖同你嘈。冇錯, sales 可以係基層,但以鋪頭清潔為例,唔過份一般唔難為你,因為係開鋪或閂門前做,唔趕做生意,都趕住收工,佢想留你做,佢腦細都唔肯啦!

到工業安全,屋邨鬥委會,做唔到就鬥死你,專俾難題,有冇錢都覺得自己大晒,反而六星級商場,預防關公災難,寧願做唔到都唔好出事。

戴返個頭盔先,任何場總會有好客壞客,但綜合返上面各樣,六星級商場,啲客 nice 啲,唔駛對鬥委會或法團,更唔駛同政治打交道,做高空嘢,管理層驚出事過你,加埋唔駛俾外行人亂咁嚟,點解我唔做呀?


羅永康
以基層角度探討社會問題,曾以筆名約翰.拿殊撰香港淪陷告台灣朋友書,太陽花學運時在當地廣傳。

5 則留言:

  1. 呢篇文衹有追影族夠份量回

    回覆刪除
    回覆
    1. 又唔好咁講,網上大把行家啦
      就算係六星級商場,都有六星級商場嘅難處,在下冇機會做,但聽講呢D商場最主要工作係湊大客(即係名店),但而家內地所謂富貴客咁多,其實有時應付部分以為有錢就大晒嘅客都幾頭痛

      刪除
    2. 不過呢其實每個商場總會有D麻煩客,六星級商場D客其實唔一定係nice嘅咖,有學識嘅有時仲會覺得自己好有道理添,甚至在下睇八卦新聞聽過有D所謂名媛要封晒間舖畀佢自己揀衫又諸多挑剔

      刪除
  2. 本港零售市道經歷24個月連跌後,最新公佈3月份數字終於「止血」,總銷貨價值按年升3.1%;2月份數字經修訂後跌3.2%。累計首季,本港零售數字跌1.3%。

    扣除期間價格變動後,3月份總銷貨數量按年上升2.7%,前值為下跌3.6%。
    按零售類別劃分,珠寶首飾、鐘錶及名貴禮物的銷貨價值升8.4%,其次為服裝按年升2.5%,藥物及化妝品與超級市場貨品則分別升3.5%及2.6%;百貨公司貨品亦升0.1%。至於2月份勁跌14.9%的雜項耐用消費品,至3月則回升9.5%,汽車及汽車零件亦由跌4%轉升16.0%。
    今年首季與去年第四季比較,經季節性調整的零售總銷貨值臨時估計跌2.3%,而經季節性調整的零售業總銷貨數量臨時估計則跌2.2%。

    回覆刪除