悶聲發大財

(from Yahoo Blog)
2012年3月15日下午5:06｜公開｜累積瀏覽 106

領匯上市後幾年, 後知後覺的我, 至喺2008年第一次試探式買入少少領匯REIT, 依家講番, 已經係4年幾前嘅事。呢幾年間, 不斷觀察呢間公司嘅表現, 差不多每段相關嘅報導都唔想錯過, 與此同時, 亦都會留意領匯租戶嘅表現。

幾年來, 領匯不斷提升旗下商場嘅營商環境, 人流量的確增加咗唔少, 理論上商戶嘅生意額亦應該有所進賬。

但係, 耐不耐仍然睇到有D報導...甚麼領匯瘋狂加租, 商戶做埋都唔夠交租之類。我係「市場派」, 信奉自求多福, 對某些因為做唔到生意而嘈喧巴閉, 一日到黑鬧神鬧鬼, 怨天尤人嘅取態, 不敢茍同。

業主與租戶嘅關係是唇齒相依的, 試問有邊個業主唔想自己嘅租戶「好生意」。既然商場營運者已經改善咗商場人流, 如果個租戶都仲係發覺「旺丁不旺財」, 做埋都唔夠交租嘅話, 咁就要檢討吓自己有乜野不足嘞......點解人地做到, 你做唔到??

通貨澎脹唔係今時今日至發生, 所有物價 (包括人工, 原材料, 舖租) 都升晒水, 所有生意人都面對緊同一問題, 個個都猛咁諗計去開源節流, 諗多D野嚟增加生意額架啦~

中國人有句說話, 叫「悶聲發大財」, 受惠於商場營商環境改善, 而做多咗生意嘅商戶, 大多數都唔會大鑼大鼓周圍唱, 同人講自己點樣點樣好生意。只剩番嗰D固步自封, 沉醉於當年如何如何「好好搵」嘅商戶, 日哦夜哦, 好似前世欠佢咁.....計我話, 與其花時間、花精力鬧爆領匯, 不如花多D心機, 搞好自己檔生意好過啦!

老實講, 世界不斷在變, 某D人自己鍾意懷愐過去風光嘅日子, 乜鬼野都想當年......現實係, 人流多咗, 你都係唔夠生意做, 咁咪即係D街坊行過都唔幫襯你, 唔再需要你囉, 唔該快D執咗佢, 唔好阻住地球轉, 騰番個舖位出嚟, 俾其他人做把啦, 等班街坊有其他選擇好過咯!

自由市場經濟, 租金水平幾時都係同人流量掛鉤, 搵唔夠交租只係你冇本事...我信呢個世界係「汰弱留強」架!!

(給某些商戶的忠告：領匯2011年11月公佈的平均呎租只係$34.2, 與其他商場比較, 仲有一段距離, 大有條件再加租架, 如果依家已經覺得頂唔順, 我勸你都係快D斬纜, 再 "dum" 落去, 分分鐘連以前賺賺埋埋嗰D都要嘔番出嚟呀~)