我

(from Yahoo Blog) 

個人篇：幾十歲, 家住柴灣, 草根一族, 家徒四壁, 生活簡約。

工作篇：懶到出汁, 死蛇爛鱔, 食緊老本。

生活篇：閒來無事, 上吓網, 玩吓fb, 寫吓網誌, 記低生活事, 好待腦退化後, 唔使抓爆頭都可以慢慢回味。平日行街, 特別留意商舖租賃情況,了解市場, 既為興趣, 同時也為自己的投資做功課。

興趣篇：對做生意都有一DD興趣, 但係就懶過鬼, 唔想咁困身。退而求其次, 想買樓/買舖收租, 印印腳, 不過諗落都係嫌煩, 又要揀租客, 又要搞裝修/執漏, 又驚自己好衰唔衰, 遇著個「租霸」, 又或者跌隻鋁窗落街, 搞到自己周身蟻, 又又或者個租客有乜 "依郁", 將我層樓變成「凶宅」, 咁就多得佢唔少咯, 於是乎再退多—步, 買「領匯」房地產信託基金 (REITs) 收息算數, 乾手淨腳。

投資篇：烏啄啄, 做過「雷曼苦主」, 見識過銀行職員為速成生意, 無所不用其極的卑鄙手法, 氹人落沓。蝕清光, 銀行無賴唔認賬, 那種血本無歸, 有冤無路訴的心情, 刻骨銘心, 永遠不會忘記。依家唔再信銀行職員咯, 唔買基金, 唔做掛鈎存款 (呢兩樣, 銀行食水都好深, 賺就佢賺, 蝕就我蝕), 自己買股票收息, 贏輸自負, 唔使再俾銀行 "SELL屎" 老點。除咗領匯, 都會買 ETF 盈富基金, 貪佢跟足晒大市, 唔會蝕抵, 管理費又平, 兼夾省卻了揀股的煩惱, 啱我呢Ｄ懶人, 樂得消遙。

以上生活篇, 興趣篇及投資篇, 都會心隨境變, 隨時更新。


免責聲明：投資有風險，自己衡量，唔好跟人

2011-07-28