總瀏覽量

2013年7月13日 星期六

[領匯商場] 海富商場 @2013-07-13

(from Yahoo Blog)
2013年7月13日

海富街巿最近新聞多多, 聞說話領匯想將個街市重新規劃, 並一早通知當區區議員, 以便諮詢居民及商戶。

原本一路都風平浪靜, 冇人反對, 但到埋門一腳, 又有另一政黨走出嚟牽頭, 搞怎麼「保留海富街市」, 有人話「某某某不代表我」喎, 政棍與政棍之間鬼打鬼, 搞到七國咁亂。

是日交通:港鐵柴灣站 → 奧運站


 
<1>  海富商場 (地址:旺角海庭路2號), 樓齡大概14年, 建築樓面面積只有66,800呎, 奀豬場一個。豪大大的奧海城商場1、2、3期近在咫尺, 而呢個細場仔夾夾埋埋只得21個舖位, 唯有在大孖沙的手指罅間尋找生存空間啦

<2>  開始巡舖。地下嗰層共15個舖位, 1號舖係Smile Bread百份百大師.即造烘焙

<3>  麵包舖外

<4>  商場內。Smile Bread 百份百大師.即造烘焙 (1號舖) 係華心商場以外的首間分店

<5>  有傳聞話惠康超市 (2號舖) 會搬過去街市嗰邊, 成為街市的一部份, 不過依家俾班友仔搞一搞, 又未必搬得成咯。超市隔籬的英明玩具廊 (3號舖), 咁晏都仲未捨得開舖, 究竟係佢懶惰豬還是O2太勤力呢?!

<6>  文文時裝鞋店 (6號舖) 即將租約期滿。其實以佢嘅貨式, 應該開喺街市會適合D囉。

<7>  Pantry 廚坊 (8, 11號舖) 裝修簡約, 生意都唔錯。鏡頭外的9號舖係7仔, 富榮花園嗰間7仔啱啱摺咗, 依家附近得番海富呢間7仔咋。

<8>  (左) 海富商場管理處 (10號舖);(中) 海富街市其中一個入口;(右) Pantry 廚坊 (8, 11號舖) 的另一個門口

<9>  (左) 時代中西葯房 (12-13號舖);(右) 街市另一個入口

<10>  添豐(海富)洗衣店 (15號舖) 假假地都叫做街舖, 舖面咁闊, 要嚟做洗衣工場, 太嘥料了

<11>  入番商場中庭, 以扶手電梯上1樓

<12>  上到1樓。海富美食餐廳 (104號舖) 外

<13>  商場通道。直出係花園火鍋海鮮酒家 (106號舖), 前面有行人天橋通往奧海公園 & 奧海城。

<14>  近天橋口的花園火鍋海鮮酒家 (106號舖)

<15>  海富商場連接奧海公園 & 奧海城的行人天橋

<16>  由天橋望向富榮花園

<17>  由富榮花園望番過去海富商場 & 海富街市

<18>  新海富街市外

<19>  「商戶代表」的王朝美食 (街市12號檔) 位於街市門口的龍頭位。街市內多個檔口已遷出, 冇乜野賣, 但因為街坊以呢條巷作為通道, 特別多人路過, 所以阿「商戶代表」非常肉緊海富街市的去留問題(因為佢個位置太靚喇, 當然唔想郁啦)。多口講多兩句, 其實領匯將街市重新規劃已有往績可尋, 柴灣環翠、柴灣興華、何文田愛民、將軍澳明德、大埔大元.... 等等, O2都有去過, 雖則領匯每次有動作, 例牌都有人嘈, 但改動和翻新後的確係更加切合居民需要, 客流量多咗, 商戶自然生意好啦。

<20>  街市外的區議員橫額。O2冇政治智慧, 唔知呢班友最終玩成點, 亦都唔理得咁多, 但最終海富街市的去或留應該以街坊的意願為依歸, O2只希望街坊滿腔熱盛地簽名「留住海富街市」的同時, 也能夠身體力行去幫襯D檔戶, 唔好得把口, 否則, 就算爭取成功, 亦只會令留下來的檔戶兩頭唔到岸,「求生不得, 求死不能」, 善哉! 善哉!


 
海富商場.商戶名單 @2013-07-13
地下  
1 Smile Bread 百份百大師.即造烘焙 ( B&C麵包屋)
2 惠康超級市場
3 英明玩具廊
4 ?
5 天然護髮用品中心
6 文文時裝鞋店
7 薈萃音樂中心
8, 11 Pantry 廚坊
9 7-11便利店
10 海富商場管理處
12-13 時代中西葯房
14 ? ( 凱瀅美容中心?)
15 添豐(海富)洗衣店
賞金店
東亞銀行ATM
1  
101 萬寧
102 海富醫務中心 - 梁維醫生
103 Salon De Vie 新偶像髮型
104 海富美食餐廳
105 ?
106 花園火鍋海鮮酒家
 

***

 如欲參觀其他領匯商場 請往>>>  巡視日程表 

6 則留言:

  1. 有一个成功例子, 運頭塘商场,原来街市改造为惠康,吉野家,Cake Shop. 收益由2011, 2012, 2013上升over 50%。 商场100% full house.

    回覆刪除
    回覆
    1. 好快會係海富商場成為另一個成功例子,大家拭目以待。

      刪除
  2. 雖則領匯每次有動作, 例牌都有人嘈, 但改動和翻新後的確係更加切合居民需要, 客流量多咗, 商戶自然生意好啦。

    >> 就係領匯成日都想賺得多... 就逐漸將各地方既街市變做超市!
    你有無問過市民先? 自把自為, 一意孤行, 就緊係乞人憎

    如果你公開諮詢, 例如搞居民大會, 搞投票, 如果多數邨民覺得應該將街市變超市, 咁都未遲啦.

    海富苑明明都有超市, 街市有值得保留既地方領匯就將佢重新規劃做超市...

    你唔好唔記得, 其實領匯係入侵者!

    回覆刪除
    回覆
    1. Chi Ho仔,原來你個concept一直都錯晒,領匯不是你所講的入侵者。
      係當年房署做得太差,入不敷支,搞到要將D商業資產上市套現,因而成立了領匯。

      刪除
    2. 但O2你要明白,房署並唔係個個自己嘅商場都差成禁;我明白你支持領匯,但領匯真係樣樣都做得好咩!? O2,如果你再一意孤行,我以後也不再理你!!!嗚…:'-(( 世界上沒有人沒有優點,也沒有人沒有缺點!!!!!!

      刪除
    3. 衷心多謝你一直以來的支持!!(講真的)

      正如你所講,領匯當然唔係樣樣都做得好,但係D衰野自然會有主流媒體及尊貴議員出來指指點點、說三道四,O2亦會抱著「有則改之,無則加勉」的態度坦然面對。

      你也要明白,插領匯的聲音經已全城泛濫,係又鬧,唔係又鬧,多我一個唔多,我再講都係多餘的,有時反而覺得D人係吹毛求疵添。O2起呢個壇時,由Day 1開始已經係打著「為領匯發聲」的旗號,從來都冇變過,O2亦會繼續抱著同一宗旨/立場去寫此blog,否則,當O2 Blog變成冇既定立場,人鬧我又鬧,同《蘋果、東方、高登》的論調一模一樣,冇咗O2 Blog的自家風格的話,你更加唔須要再睇啊!

      刪除