沒有閒情鬧領匯的人

曾在舊文《我係死窮鬼》分析過公屋居民的消費力, O2始終認為公屋人是幸福無比的。

 

大埔嵐山的高級劏房, 近期成為城中話題。據說, 該樓盤離鐵路站相隔十幾分鐘車程。O2久居柴灣, 由屋企行去港鐵站只係幾分鐘步程, 習慣咗出入方便, 一定唔會考慮該樓盤了。

 

講起劏房, O2又有好介紹, 在柴灣區的...

 

金源樓, 24呎, 月租$2,600,「有窗無冷氣 梗房不煮食」(平均呎租$108)。吓, 24呎唔夠住? 咁租晒成個單位啦...

 

金源樓, 實用面積260呎, 月租$8,800 (平均呎租$34), 抵好多!!

 

 

不過呢, 眼白白每個月進貢$8.8K畀人地, 太肉赤了。貴為公屋人, 當然另有盤算啦, 可以將$2K用來交租, 剩番$6.8K放入O2的「月供寶盒」, 都不知幾爽!

 

若果你對金源樓有興趣的話, O2可以畀多D資料過你參考...

 

 金源樓 (門牌：柴灣道345號), 樓齡36年, 大概2年前做過大維修, 行去港鐵柴灣站, 只需幾分鐘, 對面樂軒臺樓下, 有巴士站, 一大堆巴士路線, 多到你唔識揀。樓下有地舖, 銀行、食肆、診所等基本野都有, 二樓有個豆泥商場仔, 附近有食環署街市, 買餸超方便。

 

金源樓成交個案 (來源：中原)

 

 

嗱, 睇到啦, 人地住私樓的, 每個月交完租, 仲有幾多剩? 租約完咗, 又分分鐘要再搵地方搬, 居無定所, 比起無後顧之憂的公屋住戶, 佢地邊度得閒鬧領匯吖!!

 

依家只係剩番以下幾類人會鬧領匯：

1. 食飽無憂米, 得閒傷春悲秋, 日日掛住追尋「那些年」、「集體回憶」的人

2. 睇小公屋居民消費力的人

3. 自以為為民請命, 夾硬要公屋居民用噏耷商場的人 (只要睇下翻新後的領匯場人頭湧湧, 已清楚說明居民的選擇)

4. 靠鬧領匯來爭取曝光, 撈政治本錢的人

5. 已被洗腦, 死牛一邊頸, 聽到「領匯」兩個字已經諗埋一邊, 認定領匯做咩都係錯的人

6. 享受超級平租多年的既有利益商戶

7. 希望時光停頓, 唔想有轉變的人

 

係咁多先, 諗到再講。

 

 

＊＊＊

 

 

2013-01-31：我係死窮鬼 (re: O2認為應該以「可支配收入」來衡量公屋住戶的消費力)

2014-06-05：黑心鬼O2 (re: 圖12, 樂軒臺地舖的業主, 正是禾稈冚珍珠的公屋人)