O2眼中的天水圍 (2)

(Disclaimer: 以下偉論沒有做過資料搜集, 全憑O2的個人感覺, 有錯請指正)

與823戰友談起領匯商場在不同地區的收益, 上等人區如赤柱, 事實上仲屎過平民區的小西灣; 位處市區的愛民廣場, 也渣過新界區的沙角商場。

這不其然令O2想起天水圍, 一般人對天水圍的印象, 仍然綑綁著「悲情城市」的牌坊, even住在該區的人, 自小潛移默化, 仍有殘留記憶, 也當正自己係最苦難的一群, 衝不破「悲情城市」的詛咒。

最近, 天瑞街市完成了翻新工程, 我們的Chi Ho仔過料話個街市整到好似market place/360咁。O2也有參考過其他用家的網上貼文, 有讚亦有彈, 但這不是今日想談的重點。

資深Blog友 (唔一定係823戰友) 都知, O2對天水圍區是看高一線的, 部分理由在2014-03-06《O2眼中的天水圍》已提及。

天耀邨於1992年入伙, 是天水圍的第一條公共屋邨, 眨下眼已是22年之前的事了。想當年, 冇人肯入天水圍, 房署要以特快隊以及discount租金吸引市民入住, 公屋輪侯冊人士如被派往天水圍的話, 還是千萬個不願的。本地人 (O2唔想搞分化, 但又唔知點形容) 情願等第二次、第三次揀樓機會, 都唔想搬入天水圍; 至於新移民呢, 反正都已經係離鄉別井咯, 但求可以上樓, 會冇本地人咁揀擇, 於是乎天水圍便累積了一大群新移民了。

當年盛行中港婚姻, 新移民婦女來港後, 須要適應新生活, 有些甚至會面對不同程度的家庭問題。97泡沫爆破後, 香港經濟下滑, 工廠倒閉, 基層工種如中港貨櫃車司機收入銳減, 正所謂貧賤夫妻百事哀, 當年的多宗家庭悲劇, 令天水圍背上了「悲情城市」這個so沉重的枷鎖。

此一時, 彼一時, 當日的所謂新移民已經轉晒3粒星, 名正言順的香港人了。熬過了辛酸的日子, 守得雲開見月明, 當年含辛茹苦、咬緊牙關供書教學的塞豆窿都大個仔了。阿媽唔使湊仔, 可以全身投入勞動市場; 阿仔讀飽書, 都出嚟做野咯, 屋企多咗2個人搵錢, 鬆動晒!!

所以呢, 就算到今時今日仍然有人戴住有色眼鏡睇天水圍, 不過O2就唔會囉!

交通網絡日催完善, 加上人口結構的變化, 今天的天水圍已經不可同日而語了。

未去過天水圍而又執人口水尾, 仍然以「悲情城市」來形容天水圍的朋友們, O2誠意邀請你即刻動身, 去天水圍走一敞, 親身體驗一下, 一於信自己, 祝旅途愉快!



時序：
1992　天水圍的第一條公共屋邨-天耀邨入伙
1997　亞洲金融風暴
2003　西鐵線通車

＊＊＊

 

2014-03-06：O2眼中的天水圍

2013-09-26 經濟日報：先施百貨吸客擁兩張王牌, 瘋狂大減價60次特賣場 (re: 見慣世面的先施公司大老闆也驚訝, 天水圍的生意好到嚇死佢)