領匯成魔之路

「一般人」只知道魔鬼是領匯的代名詞, 有冇人會考究下, 這隻魔鬼是怎樣鍊成的?

 

今日《蘋果》露了一點端倪

正所謂花無百日紅, 有人以為政府大把錢, 有個金山任食, 成日要求政府開庫派錢, 忘記了庫房都會有乾塘之一日。

 

故事就由九七回歸開始講吧...

 

【97亞洲金融風暴】97回歸遇上了亞洲金融風暴, 政府動用外匯基金擊退大鱷, 表面上香港是勝了一仗, 暗裏已是元氣大傷。80/90後的你, 當時還在父母的羽翼之下, 未必感受到當日是何等的悲壯。

 

【03世紀大瘟疫】2003年的沙士, 應該有印象喇啩? 全港仿如死城, 點只係This City is Dying咁簡單, 當時的香港係「死咗」, 而唔係「死緊」呀!

 

中原城市領先指數 CCL (1997年7月指數為100點) 

 

【05領匯上市】1997-2003年, 樓市跌/股市跌, 滿街都是負資產, 經濟持續低迷, 公司執笠的新聞無日無之, 有工返的都唔知幾時會輪到自己接大信封, 連拜年都唔敢恭喜人地「財源廣進」, 人人苦口苦臉, 坐困愁城。坐下坐下, 坐食也會山崩, 在迫不得已之下, 房署無奈也要變賣資產了, 計劃將一堆屋邨商場打包套現。擾擾攘攘, 領匯終於在2005-11-25出世了。

 

房署籌備出售屋邨商場時的風風雨雨, O2沒有太在意, 一來自己唔係股民, 冇抽IPO; 二來自己已經唔吼嗰D噏耷商場好多年了, 覺得事不關己囉。

 

再話說當日有對沖基金睇中領匯, 即係俗稱壞孩子基金的Children's Investment Fund (TCI)。TCI志在搵快錢, 佢揸咗好多823, 一度成為單一最大股東, 並加入董事局揸旗, 逼令當時的管理層要「極速」改革旗下的商場, 租金方面當然係想「一步到位」啦。就係咁, 領匯嗰名就畀TCI搞臭咗, 變成一隻人神共憤的吸血鬼了。

 

【08環球金融海嘯】領匯當年的管理層力抗TCI數年, 是辛苦的, 好彩TCI的如意算盤最終也打不響。到08年金融海嘯之後, TCI也有點意氣闌珊, 分段減持823, 直至2010年羅爾仁劈炮, TCI便徹底與領匯脫離關係了。所以呢, 領匯自上市以來已經換了幾次領導層, 現屆管理層齊腳後, 領匯已經重新上路, 步入正軌。

 

只可惜, 一日成魔, 一世都要背上魔鬼之名, 難以在世俗眼光中得到「更生」, 明明是做對了的事, 卻畀人在雞蛋裡挑骨頭, 畀人奚落, 這正正就是現屆管理層所面對的挑戰。

 

唔使驚, O2會為你們打氣, 加油呀, 迎難而上呀, 唔係使乜高薪禮聘你地返嚟呀!! (噓~~~ 講呢D)