總瀏覽量

2014年5月15日 星期四

對吸血鬼愛恨交纏的可憐小商戶

《蘋果》真有號召力, 其他報紙拍馬都追唔上。2014-04-25已經有報章報導領匯賣仔的消息, 到2014-05-12《蘋果》執人口水尾, 好畀面地以《領匯賣殘舊商場洗底》為題, 喺財經版用咗差不多全頁的版面報導, 咁就即刻有班後知後覺的政棍出嚟做show嘞。

班食塞米抗議示威, 講嚟講去都係三幅被, 淨係識得叫政府用民脂民膏嚟回購領匯5小子。OPM之嘛! 講得幾口響都得啦! 廢噏! 可以不理。
 
最可憐係嗰班小商戶, 明明對領匯恨之入骨架嘛, 咁家陣領匯肯同佢地分手咯, 應該係開心都嚟唔切啦!
 
點不知, 從報紙或者電視新聞的訪問所見, 小商戶係驚「新業主」加租仲狼死過領匯喎! 有D仲話擔心會畀「新業主」踢走添!
 
嗱嗱嗱, 呢D咪叫身在福中不知福囉! 終於知道領匯呢隻吸血鬼已經係手下留情呢!!
 
 
吸血鬼領匯
 
***
 
2014-05-12 蘋果:領匯賣殘舊商場洗底(唔睇就笨版)
 

14 則留言:

  1. 當阿仔係屋企時,老豆就係最惡,成日用藤條打,阿仔話慘無人道。好喇,而家老豆放你出街,油尖旺,你先至發現原來出便D人仲惡,佢地係用西瓜刀架,呢個時候,你開始覺得老豆好。

    回覆刪除
    回覆
    1. 對對對,形容得好貼切 ^^

      刪除
    2. 惡人呀惡人, 點解你要用西瓜刀呢? 你係咪想抹殺我對藤條的集體回憶?

      刪除
    3. 對住一班「畀個良心佢當狗肺」的衰仔包,一定要出動西瓜刀,藤條唔夠力架!

      刪除
    4. 其實應該話, 本來幸福既家庭, 俾個惡毒後母踢走生母...
      而家惡毒後母就嫌個仔無出息, 就賣俾人
      你話個仔可唔可憐吖

      刪除
    5. Logic錯晒,生母唔係畀人踢走,係佢自己棄糊咋。當年係生母持家無道,荷包乾硬化,賣仔求榮呀!2005年,個衰婆袋走幾百億真金白銀,丟低一班親生仔置諸不理。

      正所謂慈母「多敗兒」,班囝囝後來多得「惡毒後母」連番鞭策,多位囝囝亦脫胎換骨,修成正果。當然,亦有些衰仔包是無出息的,在教而不善之下,唯有賣之哉也,始終,親生仔不如近身錢啊!更何況都唔係自己親生呢!

      刪除
  2. 其實一句到尾以家能領匯係上市公司,香港係自由經驗,如果誠哥賣佢其下資產,邊個有權阻止佢?私有公司本來就係要為股東追求盈利。私有財產任何人任何公司有權利去賣買

    回覆刪除
    回覆
    1. 所言甚是,尊重法治精神的人當然係咁諗,只可惜,這個曾經令香港人引以為榮的核心價值,已在不知不覺間悄悄地溜走。依家D人最鍾意搵傳媒和政黨炒大件事(小商戶老板多數都係政黨的樁腳)。今天的主流傳媒,已經沒有客觀報導這回事,總喜歡以偏蓋全,所有角色已預先設定...
      地產=霸權;
      超市=壟斷;
      領匯=魔鬼;
      商家=吸血鬼;
      小店=有人情味;
      無牌小販=自力更身;
      加租=瘋狂加租;
      集體回憶也可以凌駕私有產權;
      舖頭執笠一定賴租貴....
      這就是今天的香港了。
      連私有產權也保不了,爭取民主來幹啥!!!

      刪除
    2. 私有產權? 領匯之不過係官商勾結既產物

      刪除
    3. 官商勾結?你諗清楚自己想講乜先啦!

      刪除
  3. 領匯由未上市就比人嘈越鬧股價越升,業績盈利股息越來越高。好多人只係一面倒,唔係用公司創造價值能力去睇。佢地就繼續不滿啦,我地就繼續收集。如果真係無良,早就同外面租金水平看齊了。如果咁講,我地領匯股東更可理直氣壯嘈管理層啦。以家好多人根本唔知外面街舖業主更加係吸血鬼

    回覆刪除
    回覆
    1. 有時真係唔介意得咁多,誰人背後無人說,公司同事、家族親戚之間都會互說不是啦,這是無可避免的。
      作為一間與居民息息相關的本地上市公司,「有人鬧」可以視作一種鞭策。
      以領匯咁大間公司來說,應該要有虛懷的胸襟,接受批評,抱著「有則改之、無則加勉」的態度。
      而以O2呢類小小小股東的角度來看,「多唔多人鬧」係是否繼續持有的指標。
      多人鬧=租金水平仍有追加的空間
      少人鬧=租金已接近市值水平
      冇人鬧=租金與市場睇齊
      有人讚=即是領匯做緊大慈善家,租金超低水,對股東唔住了

      刪除
    2. 對股東唔住好過與全港人為敵

      刪除
    3. 有你呢句,O2可以放心繼續持有823了。你的出現,即是話領匯仍然位於「多人鬧」和「少人鬧」的category,唔使放住咯 ^^

      刪除