政府街市有２個業主？

2014-06-27《am730》

 

 

2014-06-27｜am730｜真假政經 - 營商環境

 

隔幾日就會去屋企附近街市買餸。早排去得冇咁密，呢輪就去番密啲，撞正食環署做嘢。

賣魚勝臉口黑晒，收埋張身分證之後話，剛剛食環告佢阻街，又要罰錢。佢無奈地話，呢期一個星期都會來一轉，佢都冇辦法。當然，我好明白，依家休漁期，賣魚勝可以賣嘅貨確係唔多，可以賣出去嘅自然要show晒出嚟，可能因此擺出界。不過，咁樣掃場之餘，唔代表啲魚賣得平。兩條紅衫加埋接近五十蚊。賣魚勝話，休漁期嘛，有啲魚係漁民搵命搏，走出去捉嘅，價錢梗係貴啦。

 

豬肉榮間舖頭就唔知點解細咗一半。豬肉榮嘅伙記冇答我，不過另一位阿姐就話，原本個舖係兩間舖合併而成，兩個唔同業主。其中一間舖嘅業主加租，加到五萬蚊一個月，我聽完都嘩一聲，因為五皮嘢一個月，都唔知要斬多幾隻豬至頂得順。見到豬肉榮斬排骨嗰陣，幾乎唔夠位發力，隨時驚佢拗柴。

 

菜檔自從搬入去冷氣街市之後，生意查實少咗。菜檔阿姐收拾緊嘢，好似收檔咁嘅款，隨口問一句，原來又係食環掃場，於是乎就將啲貨收番入去個位。幫襯菜檔咁多年，由大舖搬中舖，再由中舖搬入街市，元凶就真係貴租。上一次佢地搬走，直頭係業主逼遷咁滯。阿姐話，以前佢地響街市之地舖賣菜，食環會告阻街，不過告咗畀錢就算。但係，搬入冷氣街市就唔同。如果一年之內，有三次畀食環告，就唔再租畀佢地，所以每次嚟都相當緊張，而且，食環經常玩突擊，都幾煩。

 

雞佬間舖就響街頭，每次幫襯佢，我一定循例爆一句，好x貴呀！大家應該點樣睇貴定平呢？一隻雞，劏好咗，掛咗出嚟，盛惠一百八十蚊(包內臟)。譬如話，大肚婆坐月要飲雞湯，假如閣下真係癲到話要用新鮮雞㷛，一隻一百八十蚊，一個星期就真係襟計，隨時成千銀。雞佬話，上面啲雞唔畀嚟，價錢冇得平。我就一隻雞通常食唔晒，會買半隻，都要七十五蚊，一餐就蒸完。雞佬話，來貨貴咗，冇晒辦法，而且舖租加咗，冇辦法要賣咁貴。我親眼見過有C9問完價錢就走人。其實，點解住在香港，如果真係認認真真咁樣去買放心嘅食材，真係要咁貴呢？

 

呢個問題，就係政府高層唔會亦唔嘗試去理解之問題。香港要搞放心/良心食物，成本唔平，樣樣都要錢，但係政府以自由市場為名，唔係好理舖租，於是租勁貴，市民去街市買嘢，一啲都唔平。香港有好多農地冇人理，政府高層以為香港農業只係用來養活自己的作業，又或者係中產禮拜六之親子活動，冇想過自己種菜自己食，唔好依賴入口。至於新鮮雞，卻變成中高產之專利。假如你攞緊政府之津助，你都會覺得，其實有幾耐冇買過新鮮雞呢？靠波叔等高官就可以幫香港走出以上嘅經濟困局？講呢啲，哈哈！

 

王慧麟

 

 

＊＊＊

 

 

輪到O2出場：

 

睇完成篇野, 有冇諗過點解「食環署街市」會有兩個唔同業主收租?

 

乜唔係「香港特別行政區政府」至係業主咩?

 

有人食政府夾棍嗎?

 

要去搵申訴專員公署做野嗎?

 

吓! 乜政府街市係月租$50K一個檔口呀!!

 

咁領匯咪賤租檔位? 一定要追加咯!!

 

 

＊＊＊

 

 

2014-06-03舊文：數字人生 之 麵包店租金