(from Yahoo Blog)
2012年5月14日下午5:14｜公開｜累積瀏覽 546
房委會決定今年9月清拆柴灣工廠大廈, 有區議員掛咗條橫額話「關注 柴灣工廠大廈用途 要求 政府聽取居民意見」。
睇落去我就覺得呢個區議員係彈弓手, 冇立場, 都幾縮骨囉! 佢完全冇表示過想呢度用作乜野用途, 又冇講過居民有乜野意見。如果佢掛呢條BANNER出嚟只係想收集居民意見, 咁我身為柴灣居民都想講番幾句。
※ 首先, 我要求房署必須如期清拆, 切忌議而不決, 決而不行。
※ 土地用途方面, 我要求房署盡快興建公屋, 好讓輪候冊上的市民盡快解決住屋問題。
※ 側聞有私樓居民要求該土地用作興建社區中心, 我倒建議政府將柴灣青年廣場重新定位, 集社區會堂及青年中心於一身, 從而改善青年廣場的空置率, 以及更有效使用社會資源。
※ 我反對無厘頭的保育。柴灣工廠大廈毫無設計美感可言, 只係當年政府急就章, 為安置山寨廠而興建, 香港工業北移, 呢座工廈已完成咗佢嘅歷史任務, 早10年前都應該要拆, 我睇唔出有乜野保留價值。柴灣工廠大廈樓齡53年, 維修保養費用高昂, 多項設施亦已不能符合今時今日的建築及消防條例, 若硬要保育成甚麼甚麼藝術中心之類, 必定花費大量公帑, 而又改到面目全非。(可參考灣仔和昌大押, 上環永利街項目, 保育之後, 反令一般小市民可望而不可即。)
※ 建議房署新建公屋時, 可從設計上花多點心意, 以緩和新翠花園業主的焦慮, 例如每10層僻出一層樓面作為空中花園之類, 用作綠化環境及通風等等。(純粹舉例, 呢方面我唔在行, 要留番俾建築師研究。)
※ 至於有人要集體回憶, 咁就依家即刻去影多幾張相。「回憶」唔使吓吓都保留實物架!! 正如你掛念祖先, 都唔會擺罌骨灰喺屋企啦!!
※ 最後, 仲有一個意見, 不過依家民粹主義泛濫, 應該唔WORK, 就係將塊地賣俾新鴻基, 興建新翠花園二期, 令到新翠花園擴建成為港鐵站上蓋的大型屋苑, 咁樣對新翠花園一期樓價應該都有正面影響。政府多咗幾十億賣地收入, 可以再尋找合適地方興建公屋。柴灣已經好耐冇新私樓供應, 該位置理應相當受柴灣公屋戶嘅分支家庭歡迎! 或者作為提供多個選擇俾新翠花園一期業主換新樓, 亦大有可為!
柴灣工廠大廈建於1959年, 並將於今年9月開始清拆。
有區議員話要「關注 柴灣工廠大廈用途, 要求 政府聽取居民意見」, 不過佢就冇寫出俱體嘅提議
灣仔和昌大押「被保育」成高級餐廳之後, 你有冇入過去?
(網上圖片) 石硤尾已經有一座由政府工廠大廈改建而成的「賽馬會創意藝術中心」, 柴灣工廠大廈做咩要做「跟尾狗」!? 好冇創意啫!! 況且, 唔好話我睇死佢, 就算係都要起藝術中心, 到時都只會係繼柴灣青年廣場之後, 另一隻大白象!!
＊＊＊
回應：
M 2012年7月3日上午11:58
我是李鎮強，機緣巧合下能拜讀到您的Blog。
有關橫額「關注 柴灣工廠大廈用途 要求 政府聽取居民意見」，當時包括規劃署和我本人的確是在諮詢居民意見，而收到的結果是，有超過百分之九十的居民和區內團體均要求將此碩果僅存的H型工廠大厦保育，並以廉價租金給予年青人發展創意工業，以將此工厦之原有精神能薪火相傳地傳下去。
其實我也曾考慮過您的想法，但這涉及太多不同政府各部門，和此地仍屬房署，除非房署肯將其擁有權先交出來，我更難獨力將之變更為私人發展用途。
O2 2012年7月3日下午5:07
多謝交流!
重申, 我是柴灣居民, 我支持如期清拆柴灣工廠大廈。
超過90%?? 是90%整體柴灣居民? 還是90%新翠花園居民? 如果我係新翠花園業主, 我都唔想果度起幢幾十層高的公屋, 影響景觀和樓價。反之, 如果拆工廈的地皮要嚟擴展柴灣公園, 分分鐘100%讚成「即刻拆」, 懶理甚麼保育, 甚麼薪火相傳了。說穿了, 「保育」只是個幌子。
M 2012年7月21日下午6:17
所有資料均從規劃署的諮詢文件報告取得, 詳情請查詢規劃署之網頁 :>
O2 2012年7月23日下午5:48
玩數字遊戲呢家野, 我都明。工廠大廈拆唔拆, 以新翠業主最關心, 結果咪....
***
追求自由 2012年5月16日下午11:33
好主意。
O2 2012年5月17日下午4:21
多謝支持!
***
亞U 2012年5月15日上午5:34
棟野.真系好舊.
O2 2012年5月15日下午5:06
所以維修保養都好貴, 房署用嘅係「民脂民膏」, 都唔明做乜唔一早拆咗佢, 阻住晒柴灣區嘅發展。
沒有留言:
張貼留言