巡視業務．領匯．天耀廣場 @2012-05-11

(from Yahoo Blog)

2012年5月11日下午6:35｜公開｜累積瀏覽 1646

 

巡完天盛商場, 帶著一點點的失落, 經天橋過去只係一路之隔嘅 「天耀廣場」。見到商場外牆殘殘舊舊, 已經唔係好開胃, 又話領匯已經翻新過嘅?

 

上網check過話天耀廣場已經做咗資產提升工程, 估唔到都係咁殘舊

 

既來之, 則安之, 因為領匯有本《最強踩車路線GUIDE》有介紹過呢個商場, 又即管睇吓

 

跟住本書仔嘅介紹, 搵到天多如美食 (街市22-23號檔), 原來喺天耀街市裡面, 係一間恰如其分的港式街頭小食專門店, 於是喺呢度幫襯咗$18 (碗仔翅$11+腸粉$7/4條)

 

幫襯完天多如, 順便巡一巡個街市。天耀街市面積都好大吓, 貨品種類整備, 應該可以做到嘉湖山莊樂湖居&賞湖居班客, 不過衰在個街市冇冷氣

 

唔知係咪天水圍人特別熱愛大自然, 街市裡面幾檔花檔、 水族館都好大檔。鴻運水族 (街市24-25號檔) 係其中之一檔

 

巡完街市, 再由商場正門入去巡商場。天耀廣場 (地址：天水圍天湖路2號), 面積182,300呎, 1992年落成, 有20年樓齡, 即係老過天盛商場7年

 

入到商場, 豁然開朗, 同出面殘殘舊舊嘅外殼差好遠

 

商戶指南改到七晒彩, 好明顯係領匯正在大刀闊斧地調整商戶組合

 

仲有D舖位未改好

 

商戶大執位, 美琪 (L003號舖)「結束 勁減」, ego; (L004-L005號舖)「不計成本 一件不留」。睇嚟好快又會有另一番新景象了

 

十勝牛和食料理 (L047號舖)

 

新店ELLA (L036號舖), 隔離聯合電業 (L037號舖) 將會搬上一層, 同煤氣公司做鄰居 (迪斯琴行舊址．L103號舖), 繼續為街坊服務

 

小飾物喺呢區似乎好有市場, 同場除咗有LI BO, 仲有ELLA的分支 ella bits (L022-023號舖)

 

有人嫌棄領匯商場太多連鎖店, 現實係間間都排晒長龍, 冇野講啦! (麥當勞．L025-027號舖)

 

高朋滿座的麥當勞

 

美心MX (L120-L121號舖) 一樣係坐滿晒食客。快餐連鎖店「快、靚、正」, 冇咩唔好呀!? 

 

叫美愉公司的格仔舖 (L107A號舖) 都有好多小飾物賣

 

A+A時裝 (L106號舖) 有D熟口面, 咪上次喺鳳德商場見過?

 

煤氣客戶中心 (L104號舖)

 

天耀郵政局 (L122號舖)

 

醫務所。西醫鄧永康 (L126號舖 / 舊110號舖) & 西醫何楚明 (L125號舖 / 舊109號舖)

 

一樓商場通道

 

如果冇咗嗰兩個人做比例, 齋睇相唔會覺得呢度地方咁大咁高

 

商場的另一個入口

 

影埋呢度就走喇! 巡視完之後, 見到天耀廣場朝氣蓬勃, 人流量一D到唔差, 證明領匯嘅改革路線係正確, 我又充滿番信心咯喎, 我發覺天水圍都唔係咁悲情啫。領匯將個商場變得光鮮咗, 有番生機, 多咗野睇, 居民都會受到嗰股氣氛嘅感染, 心情都開朗D。我反而覺得, 若果日日對住D兜兜踎踎嘅野, 噏噏耷耷咁, 耳濡目染之下, 連人嘅心情都噏埋一份囉! 見到天耀廣場搞得都唔錯, 咁即係天盛商場嗰邊嘅潛力仲未發揮出嚟啦, 咁就有需要執一執個商戶組合喇! (有新消息, 759阿信屋已經承租咗天盛商場1樓111號舖)

 

領匯都唔係包辦晒所有天水圍商場架, 喺天耀街市對面有個私人商場叫「嘉湖新北江商場」, 有人覺得佢好有特式, 鍾意佢雜亂無章, 有別於領匯商場嗰種「單一化」。正所謂「咸魚白菜, 各有所愛」, 不過我就接受唔到「嘉湖新北江商場」嗰種亂糟糟嘞, 如果我係嘉湖山莊業主, 俾我日日對住個咁嘅商場, 都幾眼冤。都冇所謂啦, 冤豬頭都有盟鼻菩薩, 我唔鍾意啫, 仲有大把人鍾意嘅!

 

 

＊＊＊

 

回應：

 

Chi Ho 2012年9月1日下午1:50

 

你係咪收左領匯錢打呢篇文

而家天耀商場變左賣時裝, 電腦舖, 阿波羅, 地踎藥房, 零食店 都搬左去街市, 外面 或者無做

取而代之係時裝店!

 

O2 2012年9月2日下午3:55

 

Chi Ho, 我估你係男孩子, 所以唔鍾意有咁多時裝店。上次我嚟天耀, 已經發覺呢度嘅飾物店好受歡迎, 亦代表呢個場嘅顧客好喜歡裝扮, 開多D時裝店只係滿足市場需求啫。你有冇修Econ? 有冇讀過Supply & Demand? 你估時裝店老闆傻架咩, 如果冇需求, 搵支槍指住佢, 佢地都唔會嚟開舖啦, 前世未蝕過咩!?

唔緊要啦, 咸魚白菜各有所愛, 政府啱啱應承咗喺天水圍撥塊地出嚟做墟市, 應該會合D唔鍾意領匯嘅人的何車, 咁咪可以多個選擇, 自動歸邊囉!

吖, 答番你最先前個問題, 領匯冇直接俾錢我, 只不過我係公屋商場End-user, 因為認同領匯嘅理念, 見佢真係有能力將D爛場死場搞番生晒, 令到我對公屋商場完全改觀, 亦對未翻新嘅商場有憧憬, 所以買咗些少領匯基金, 我想從中分一杯羹。依家我每年都有息收, 賬面上亦賺唔少, 呢個係事實。

太長氣了, last一句, 好開心可以同你交流, 我唔係經常去天水圍, 如果天耀廣場仲有D乜野新動向, 記得話我知喎! 唔該晒!

 

 

＊＊＊

 

 

　巡視日程表