草根O2論樓市，信者失救！

樓市係敝blog較少涉獵到的topic, 事關O2一生與公營房屋為伍, 對私樓市場只屬隔岸觀火, 觀點難免有所偏差, 都係少講為妙。

 

熱辣辣的樓市成了城中「重中之重」的議題, 事不關己的O2也忍不住插一把咀。

 

曉得測市的「樓市達人」多的是, 排隊都未輪到O2, 以下只是個人觀察, 絕不涉及估市成份。

好多人會以97樓市與現在比較, O2也試試看：

 

1. 隱約記得, 97前的樓按可以輕易做足9成, 晉身做業主相對較易, 但亦即是容易變「負資產」, 以10%作cushion, 手風唔順時無險可守, 那管你是投資還是自用；
2. 97前只須付1成首期, 心口掛個勇字者, 會一個人騎住幾層樓, 盡享「槓桿效應」, 都不知幾爽, 當市場逆轉, 大家爭相掟貨時, 因此加劇了跌勢；
3. 97前沒有那些so-called「壓力測試」的東西, 人人都係計到盡, 搵直系親屬幫手簽擔保畀銀行盡當, 度掂Repayment Ability Ratio便過關, 每月供樓條數自己孭番, 樣樣掹掹緊, 供樓供到氣咳, 有乜依郁就唯有焗住「斷供」, 市場就多一個銀主盤, 增加樓宇供應量, 在樓市下降軌上再踩多一腳；
4. 以投資客而言, 97前就算個單位租得出, 仍然要補少少錢供樓, 但依家係「供平過租」或者係「打和」；
5. 手持97蟹貨者, 經過17年韜光養晦, 層樓已經供得七七八八, 沒有銀行迫倉的壓力；
6. 家陣的樓市有「辣招」護體, 減辣容易, 加辣難；
7. 低息環境持續, 一下子加3厘息的機會唔係冇, 但非常低, 而且加息只會循序漸進, 就算真係加足3厘, 都只不過係5厘幾, 唔算高喎；
8. 年青人呻下唔出奇, 但如果有專家/學者/媒體, 單純以「大學生都買唔起樓」、「唔食唔用N個月」來剖析樓市, O2不會照單全收, 皆因任何年代也是如此。

 

「樓」是一樣奇怪的物體, 很能突顯香港人能屈能伸的精神, 跌時冇人吼, 升時搶住要, 明知係要做「樓奴」, 也在所不計。

 

O2重申, 以上乃塘邊鶴式的廢噏, 沒有參考過甚麼新樓落成量、平均家庭每月收入之類的具體數字, 信者失救呀!

 

 

安得廣廈千萬間