總瀏覽量

2014年3月19日 星期三

領匯霸權 vs 小販霸權

「上水站小販」這話題近日又鬧得熱哄哄, 畀Link仔哥撩一撩, 引得O2都想講番兩咀。

O2初次接觸這話題是2011-10-04, 當日《東方》的投訴版以「小販攻陷上水站 食署領匯冇眼睇」為題來譏諷領匯的不是, 力陳唔應該畀D小販喺天橋擺賣。

文中涉及多個party的立場:

1. 街坊何先生
何生話小販佔據天橋近半空間,佢個仔試過畀架木頭車撞親,要求部門正視問題,撥亂反正

2. 街坊謝先生
謝生話擔心鑊中滾油隨時會灼傷途人

3. 食環署
食環署話2011年1月至8月5日期間,就上水站外小販擺賣問題共接獲121宗投訴

4. 公屋聯會主席王珅
王珅直斥指領匯責無旁貸,認為領匯雖屬私人機構且未獲賦予執法權力,但可要求警方及食環署介入處理

5. 立法會議員王國興
王國興話食環署應加強管理和提高執法力度

這2年多以來, 領匯霸權與小販霸權兩者互相角力, 無牌小販這個老、大、難的問題始終揮之不去, 搞到彩園廣場的領匯手足頭都大晒。

O2家住柴灣, 冇乜幾可去上水, 唔清楚這股小販霸權幾時成型, 個人估計是房署年代闊佬懶理所留下來的蘇州屎吧。無牌小販坐大後, 聯群結黨 (唔排除有第3勢力保護), 膽子也越來越大了。

兩個霸權互相博弈, 大戰多個回合後, 各有勝負。關鍵時刻在2013-12-27出現了, 勢兇夾狼的小販霸權於當日肆無忌憚地衝入彩園廣場晒冷, O2望住《東方》張相, 也O晒咀, 仲有冇離譜D呀?! 豈有此理!! 咁仲成世界嘅?! 喂, 大佬, 容忍都有個限度喎!!

 
2013-12-27《東方》:小販連同手推車聚集在彩園廣場門口,令通道堵塞。(高偉明攝)
 

較近期的發展係小販霸權稍稍收斂, 一時轉戰天橋下面, 一時湧往新地的上水廣場, 但與此同時亦引起一班識寫字的朋友仔不滿, 使出一招戰無不勝的殺手鐧——集體回憶。

咁點算好呢? 趕佢地走又有人鬧, 唔趕佢地走又一樣畀人插, 腹背受敵, 究竟領匯應該如何自處呢?

據《蘋果》所講, 上水站的天橋是三權分立的, 分屬領匯 (紅框)新地 (綠框)政府 (藍框) 管轄, 前兩者係私人物業, 若果香港仍然有法治的話, 呢兩笪地方都唔使諗了, 咁剩番藍色框的公眾天橋又如何? 食環署應該要網開一面, 任由小販擺賣嗎? 或者係外判畀第3勢力管理, 又得唔得呢? 反正大家 (包括第3勢力人士) 都係搵食啫。除此之外, 仲有咩其他方法呢?

 
2014-02-04《蘋果》:接連上水站的3條行人天橋屬領滙(紅框)、政府(藍框)及上水廣場(綠框)管理。(翁鈺輝攝)
 

14 則留言:

  1. 其實係上水有好多露天車場,政府可以同區議會傾下,整番個上水天秀墟,等大家去個度集體回憶,事實上佢地寫上水站小販寫得好生鬼 :
    呢度係平民嘅天堂,只要你有一架木頭車,或者有一份創意,就可以發揮所長,發達就唔駛諗,但應該可以搵番餐晏仔食下。檔主們日頭做咩,我都唔知,不過每晚10點半左右,就會推著木頭車出現,街坊見時候差唔多,就會來碰碰運氣。就好似功夫嘅「豬農城寨」,臥虎藏龍,個個「身懷絕技」。
    廿幾三十檔流動小販,無一重複,而且每一檔都有固定位置,唔會忽然搬左去街尾,性質相近嘅一定唔會擺隔離,就連走鬼都有既定嘅「快閃逃生路線」,呢一種「地下秩序」大家都知係咩原因。

    回覆刪除
    回覆
    1. 1.有冇咁易呀?搞個乜乜墟就可以解決小販問題?咁小販管理隊可以解散啦!
      2.天秀墟係失敗的例子喎
      3.唔使失鬼,會冇咗小販檔嗰種風味,D人唔鍾意架
      4.嗰班惡霸咁囂張,政府唔拉佢,仲要搵埋地方畀佢地做生意,咁豈不是買佢怕?要向惡勢力低頭?
      5.小朋友的世界好單純,以為有架木頭車、有創意,就可以開檔?佢試下唔交保護費,睇下有咩下場?大家亦都應該反思下,香港係咪已經無皇管,要借助地下勢力來維持秩序囉!

      刪除
    2. 為左解次小朋友D集體回憶問題,我唯有叫佢地睇香港電台31頻道每晚9:30pm 獅子山下 果度大把集體回憶

      刪除
    3. Good Idea!!
      又或者ATV歲月留聲台,都可以頂到癮

      刪除
    4. 樂富有個"香港玩具博物館",裡面都有大把集體回憶
      http://onionworkshop.blogspot.hk/2014/03/hktoymuseum.html

      刪除
  2. 彩园小贩問題有很長歷史,超過20年。特別夜晚,人流十分多,所以一有机会,小販就会开档。好久以前,因为走鬼,發生滚油傷人事件。我認為LINK仔想法政府吾会同意。

    回覆刪除
    回覆
    1. 1.果然係房署留下來的蘇州屎
      2.依政府的小販政策,我都覺得政府唔會攬呢坨蘇州屎上身

      刪除
    2. 北區區議會個關唔易過

      刪除
    3. 真係好難搵人去接呢支火棒

      刪除
  3. 領匯繼逐漸將街市變超市後, 又試圖剷除另一集體回憶的例子

    小販既魚蛋檔, 點都好食過領匯既連鎖店... 如果領匯識做, 咪規範左佢... 又趕逐, 變做管理角式.... 但千祈唔好收咁費租喎

    回覆刪除
    回覆
    1. 1.謝謝你的提議,O2好驚訝你會建議「領匯規範咗佢,變做管理角色」
      2.呢壇野都預咗難收科,係有人高調地去《東方》投訴在先,咁領匯有乜辦法唔做野?依家單野搞到咁揚,若果領匯唔做野,到有意外發生時,領匯仲大鑊,權衡利弊之後,O2情願依家領匯畀人鬧下剷走集體回憶,好過傷及無辜咯!
      3.若果你有睇清楚報章的報導,你應該知道係有勢力人士喺2013聖誕期間玩大咗,領匯至被迫要加強力度做野啫
      4.O2好感謝你咁開明,同意畀領匯管理,不過個人覺得可行性不高囉。就算撇除領匯會畀人話賺到盡、發水等指控,喺條行人天橋賣熟食,一定係違反消防條例,咁就算班小販肯交租畀領匯,領匯都收唔落
      5.另外,無牌小販的特點就係要「走鬼」,走嚟走去做生意係小販檔的獨特風味。食客們要碰運氣,大家抱住患得患失的心情,有時會唔見晒D小販,有時要去地點A揾佢地,有時要喺地點B至揾到,又或者食食下要走鬼,咁先至過癮架嘛,會覺得D野零舍好味。若果變成固定地點,日日在同一地方出現(仲話要由領匯管理添),咁就冇晒風味,兼唔馨香架喇!

      刪除
  4. https://goo.gl/yWgo3D
    本土小食 - 正宗走地鷄翼串 ,小麗老師一定要試

    回覆刪除
    回覆
    1. 畀多個選擇阿小麗老師,小西灣都有走鬼檔,議員月薪$93K,一定食得起
      http://hk.on.cc/hk/bkn/cnt/news/20170128/bkn-20170128221759742-0128_00822_001.html

      刪除