總瀏覽量

2014年1月24日 星期五

班門弄斧

O2淨係識得行街 (仲要係Window Shopping, 齋睇冇幫襯嗰隻), 買入823的原因亦簡單不過, 純粹因為眼見公屋商場在領匯的管理下, 多咗人行, 就係咁簡單咋。

至於其他的專業詞彙或者股票技術分析, 老實講, 三個字講晒:一竅不通。所以當Henry問得稍為深入少少啫, O2便口啞啞, 即刻露餡了 (仲衰格到踢咗個波畀Link仔哥添)。

忽然醒起左丁山先生的一篇專欄文章, 文中有提及市場通用的Gross Floor Area (GFA) 及領匯所用的Internal Floor Area (IFA), 現借來一用, 或許可以對這類專有名詞有多一點了解。


***


2012-04-19|蘋果日報|GG細語|租金上升

「蘋果」連日報道廣東道、皇后大道中及銅鑼灣啲地舖租金驚人,動輒以數百萬元計,有美國零售店都呻,香港主要商業區嘅租金貴過紐約,但呻還呻,美國牌子還是要嚟香港開舖,情願繳交超貴租金,究竟為乜?道理一字咁淺,為咗中國自由行遊客囉,總之睇住人民幣份上,美國人絕對唔會自高自大,務必以賺錢為第一要務。「紐約時報」就報導過在一月間,紐約萬寶龍( Mont Blanc)分店內就有私人音樂會,大明星郎朗彈琴,客人聽完可參加雞尾酒會,與設計師 Oscar de la Renta, Diane Von Furstenberg把酒言歡,跟住參觀 Estee Lauder之原來原裝寫字樓。呢班客人並非甚麼貴族、大明星,只係來自中國的「血拼」遊客啫,每位中國遊客在美國平均購物六千美元,比所有遊客嘅平均使費高出五成,故此連到奧巴馬總統都下令美國駐北京大使館加多啲人手去處理美國入境簽證,大開方便之門,三四年之後,紐約第五大道之名店租金高過香港,乃可預卜。

香港商場地舖租金幾時回落?好易啫,到啲大款內地遊客大舉侵襲三藩市與紐約,不以香港為掃貨地點嘅時候,本地舖租咪跌囉,但目前仍然睇升,導致水漲船高,遊客地區以外嘅商舖租金都升,包括埋啲屋邨商場。馬主 H最近因租金問題,要自皇后大道中撤退,周圍睇吓,度度計租金都以建築面積計( Gross Floor Area,( GFA)),而實用面積比率係六成半至七成半,三十元一呎嘅 GFA租金實際上即係實用地氈面積( carpet area)嘅每呎四十元至四十六元。馬主 H計多幾次數,覺得不耐煩,向一位相熟租務經紀呻:「唉,有冇業主以實用面積計租㗎?」經紀話:「有,全港有兩個業主係咁計,就係置地公司與領匯,但你唔會搬去置地公司啲甲級商厦嘅啫,亦一定唔會搬去領匯商場,將就吓啦!」哦,置地公司點樣做,無人理會,但領匯加租就有好多人到實,經紀咁講,就引起橙與蘋果比較嘅問題。一般報導領匯加租,總唔見提及以內櫳實用面積計,反而會與市面一啲用 GFA收租嘅呎價比較,係捉錯用神噃。


***


睇完了。所以呢, 人地亂噏唔緊要, 但我地作為823持有人, 必須要清楚, 當兩間舖同時聲稱呎租$50的話, 實際上幫領匯租舖只需要30幾蚊咋, 簡單講句, 即是話領匯的呎租仍然可以追落後囉。

6 則留言:

  1. 對了,他提的地氈面積( carpet area),近似測量師學會的租用面積Lettable area,領匯保留用較闊定義的Internal Floor Area (IFA)是為自己留一些後路,爭論時更有彈性,你看最近立法局,他們以經用了2-3年討論領匯違規,但仍未有結論,說明樓面定義多複雜 : GFA, IFA, SA, CA, LA ???

    回覆刪除
    回覆
    1. 嗰班抽水精正正經經要開會時就玩no show,冇野叻,至叻係猛咁啄住領匯,依家唯有希望領匯拗得甩啦

      刪除
  2. 我買823的原因係覺得佢比較穩陣,有物業做後盾,每年穩健派息,佢由10幾元升到30幾元已經對得住持股人,甚麼專業詞彙或者股票技術分析,學黎都未必有用,股票市場地雷處處,學埋的分析反而心思思買多幾隻地雷,股海裡有80%股民蝕錢,原因在此。

    回覆刪除
    回覆
    1. 都係架,簡簡單單唔使理咁多野,收下息便算了。
      其他深奧野有Link仔哥解畫,好彩Link仔哥唔介意我將個波踢畀佢咋 =.='

      刪除
  3. "...簡單講句, 即是話領匯的呎租仍然可以追落後囉。..."

    請問有無可同類(大型平價屋園的商場)比較的同類數字(租用面積尺租)去計算仍有多少"追落後的水位?

    回覆刪除
  4. 參考下置富產業信託用"可出租總面積" 啦

    回覆刪除