網絡世界, 網民唔須要留下真實身份, 可以盡情發揮, 各自想像, 就正如Link仔哥幻想O2係1個樣靚身材正的少婦那樣。
今日見到Chi HO Fung的幾段留言, 似曾相識, 個人估計係2012-09-01曾於已執笠的Yahoo Blog留言的Chi Ho了。
觀乎他的留言, O2也發揮一下想像空間, 幻想此君是利世民先生口中的社會棟樑吧。
歸納Chi HO Fung的幾段留言及O2的回應如下：
1. 天耀廣場
Chi HO Fung 2014年1月8日 上午1:31
你係咪領匯打手? 好地地一個商場, 就俾領匯搞到咁以前天耀商場有文具舖? 而家變左精品店啊!開左廿年既美心都要趕走, 領匯真係無恥!同埋... 你點解釋領匯接手就關閉左天台既休憩空間? 係咪因為無錢賺? 點解領匯要用多左地面既公共空間0黎起舖頭? 以前電梯位對出係俾人行架, 而家就納入為商場一部份仲有, 以前房署時代, 係俾人24小時入去撳錢架, 而家, 一到凌晨就關門, 你唔話領匯見錢開眼? 一D 無盈利既項目就cut, 淨係識收錢Grassroots O2 2014年1月8日 下午3:25
你好！估計你就是2012-09-01曾於O2的Yahoo Blog講過類似說話的Chi Ho吧，好高興再見你留言。至於O2係咪領匯打手，上次已講過，唔想嘥時間寫完又寫。
2. 天盛商場
Chi HO Fung 2014年1月8日 上午1:37
你地收左領匯幾錢人工?以前房署咪幾好! 好多細舖好多人情味, 使靠你D 打手做宣傳
Grassroots O2 2014年1月8日 下午3:32
想請問，以你來說，人情味的definition是怎樣的？
實體世界裡，有幾多個街坊係你叫得出人地個名的？有冇同人打招呼？搭車時有冇主動讓位畀阿婆？還是耷低頭掛住玩電話，扮睇唔到？見到人地差幾步可以入到lift，你喺lift入面會撳住個開門掣，還是狂撳閂門掣？
3. 葵芳廣場
Chi HO Fung 2014年1月8日 上午1:40
冷氣水電鎖類配匙都要執笠....領匯係咪真係見錢開冷? 以前房署D 舖頭就好有人情味, 洗靠你D領匯打手係到唔知做乜?
Grassroots O2 2014年1月8日 下午3:34
Boutique可以執笠，酒樓可以執笠，銀行都可以執笠，點解做水電工程唔可以執笠？
你1年會去幫襯幾多次？
你有冇去葵芳實地觀察過？
4. 興華廣場
Chi HO Fung 2014年1月8日 上午1:48
以前有街市好地地, 領匯做咩要將佢變左超市, 將地產霸權擴大?你將街市變超市, 有無諮詢居民意見? 領匯為左租金收入, 犧牲幾多市民既需要。之前就所謂活化大排檔, 實情係陰乾變做餐廳? 而家領匯將街市趕走變做超市, 進一步將市民既集體回憶侵蝕
Grassroots O2 2014年1月8日 下午3:42
點解你會認為以前個街市係好地地？你未搬去天水圍之前，係住柴灣？興華街市有你的回憶？
興華邨原本有2個街市，1個歸領匯，另1個歸房署。領匯將街市改為超市，而房署則將街市轉做老人院，咁你鍾意老人院還是超市？
5. 天耀廣場
Chi HO Fung 2014年1月8日 上午1:58
居民唔係唔捨得惠康, 係點解領匯要搞咁多小動作。一路惠康都租開, 起地下又夠方便D 公公婆婆,。你知唔知有時段時間天耀係乜都無, 無超市, 無酒樓... 好地地美心+惠康咪幾好! 我諗你地領匯應該發＄寒，人地先走啫
Grassroots O2 2014年1月8日 下午3:26
既然唔係唔捨得，咁咪好囉。點解一路租開畀惠康就永遠都要租畀佢？點解？
綜合嚟講, O2發覺Chi HO Fung講得最多嘅係：
．你係咪領匯打手?
．領匯畀咗幾多錢你?
．人情味 / 集體回憶
．發$寒
無可否認80年代是一個美好的年代, 享受著經濟起飛的成果。在這個年代出生的朋友仔, 冇須經過他們父母輩的艱苦歲月, 是幸福, 也是不幸, 皆因一切來得太易, 失去了培育他們處理逆境的土壤, 遇上不稱心事, 總是覺得人家前世欠佢咁。
O2在想, 佢點幾兩點仲唔瞓, 唔使返工嗎? 份工是輪班制? 富二代, 唔使做? 啃老族? 還是遊手好閒的夜青呢? 夜麻麻唔瞓做盤戰士, 發洩一下心中的鬱悶, 是情有可原的, 吐一口烏氣之後, 生活還是要繼續, 加油呀! 父母養你育你, 供書教學用咗唔少心血, 記得要孝順父母, 出糧時要自動自覺畀家用呀! 係, 我又講錢, 你都知我係發錢寒架!
呢度係柴灣漁灣邨的舖頭, 歸房署的, 向正大街, 間茶餐廳做咗幾十年, 前兩年都執鬼咗, 咁賴邊個好呢?
都係漁灣邨, 同樣係向大街, 連西醫診所都執笠, 咁又賴邊個呢?
＊＊＊
巡視業務．領匯．天耀廣場 @2012-05-11 (re : Chi Ho仔2012-09-01首次留言)
2014-02-12 : 數字人生 之 黃毅力話領匯逼到人反枱
2014-04-19 : 《集體回憶》宣言
好高興見到你回應, 不過似乎見到你既回答, 都無正面回答。
回覆刪除以天耀廣場為例, 佢用邨民原本使用公共空間0黎起商舖, 關閉不能帶來額外收入既平台, 加租迫走原本以下本來相安無事既舊舖
志樂公司(文具店)（開業逾10年）
海威運動用品公司（開業逾10年）
典雅髮型（開業16年）
永成公司(鞋店)（開業逾10年）
鍾景熹醫生（開業逾10年）
阿波羅雪糕屋（開業逾10年）
思美減肥美容中心（開業逾10年）
美心西餅（開業逾20年）
美心大酒樓（開業逾20年）
惠康超級市場（開業逾20年）
崑崗公司(鞋店)（開業逾10年）
領匯一0黎接手, 以上老舖頭陸續遷離..
你住柴灣就可以comment天水圍商場, 我住天水圍點解唔可以comment 柴灣商場?
興華商場街市既事你應該都知, 舖頭續約無幾耐, 你地領匯就話收鋪起超市。
領匯大部份都係屋邨商場, 希望你地唔好村姑扮貴婦, 仲有, 賺錢要俾多D 良心, 俾人發現未獲批准改建就唔好啦
http://cablenews.i-cable.com/webapps/news_video/index.php?news_id=423826
1. 多謝你copy有關天耀廣場的資料，不過我從來都唔認為開得耐就唔使執笠
刪除2. O2只係823的小小小unitholder，唔係乜都知，咁唔識又點答你呢？
3. 邊個話唔畀你comment柴灣，你咪comment咗囉
4. 未批先建呢壇野，留番畀領匯管理層搞啦，unitholder唔使自己煩呢D野，只要留意事態發展便可以了
邊個話冇經批準？只係以前房署批，後來改地政署批，2個部門用不同方法計地積比，呢Ｄ交比法庭判。注意以前的公共空間其實可能是未用盡，只要合符地積比及消防條例就OK
刪除呢D 舖頭係房署年代做左十幾年都未執, 領匯0黎到就一間一間執。將D 有需要既舖頭(如文具舖) 變哂boutique 化妝店. 係, 會吸引左部份人流, 但漠視左有D 無咁有錢既人需要囉
刪除Link仔哥，我一話要留意事態發展啫，你就彈出嚟解畫了，唔該晒！不過咁呀，呢D野人地聽唔入耳架！
刪除Chi Ho，嗰D舖頭可以頂到十幾年唔執，係因為房署班官做又36唔做又36，唔需要搞好D場.......卒之房署咪搞到荷包乾硬化，賣晒佢地甩身自保囉。
恕O2多口講多句，你正藉當打當紮之年，「無咁有錢」唔應該成為自己的心理障礙，何必妄自菲薄呢？
我知, 領匯係care有消費力既一群, 對於「無咁有錢」既人, 佢地可以唔理, 所以就將D 櫈啊, 比人行既地方, 就改建做吸引到有消費力, 將空間由「無咁有錢」轉移去到D有消費力既人身上。無錯, 領匯比房署識得掠多D 人錢
刪除只不過, 賺錢都要講良心, 社會責任。
朱子治家格言話「刻薄成家，理無久享」唔知你有無聽過... 下下計回報率, 股東回報, 咪就係我地蟻民受苦囉
02兄其实你的应对是客气温和的。 我不想加把意见，但我十分支持02观点。你话我係領匯打手，我无所谓。
回覆刪除謝謝支持！O2寫blog只求自己過過癮，當然亦樂於與同路人分享啦。我的隨身錦囊有呢句：道不同不相為謀，所以從來都冇諗過要撩交嗌。
刪除畢竟，人和事總會有變遷，O2只想藉著玩巡視業務的同時，順便記錄低公屋商場的變化，作為屋邨進化史的一個小小的見證而已。
再講，O2寫唔寫呢個blog都一樣係收咁多息，若果我係為一己私利的話，呢條數根本計唔過。
O2兄你哋玩得咁開心, 侵埋我玩啦, 由今天小朋友出現開始直至午夜止, 已有差不多500個旁觀者出現過, 如果這位Chi Ho哥真是小朋友的話, 成績已不錯了, 起碼達到了宣傳的效果, 小弟都有啲朋友住係天水圍及屯門, 有師奶,有技工, 有在職於餐飲業者及商鋪之業主, 分別住在嘉湖山莊, 天耀, 天瑞, 天頌, 天盛, 良景及友愛等等, 他們亦有話要講, 希望與大家分享.
刪除你都好交遊廣濶啫，佢地想揾你做代言人還是親自嚟O2 blog留言都冇所謂，一律歡迎。
刪除話時話吖，咁多人旁觀，好可能係因為Link仔哥爆晌口，話幻想O2係索少婦，惹來狂蜂浪蝶都唔定。都係咪嘞，下次要低調D，巡舖時都係以棟住支拐杖的伯爺公形象出現算嘞！
原本好既變差, 我情願原地踏步。傳統鞋舖變馬拉松、文具店變精品店、街市變超市, 本來空間感既地方變到商鋪密麻麻, 難道係社會發展既正確路向?
刪除變好當然好啦, 變差既話. 點解要變?
有聲有色既代價, 就係D 野貴左
好似天耀以前既magic house, 飲品價錢都係平過7仔, 但領匯接手後裝修完, 價格已經係同7仔差唔多! 呢樣好明顯既分別。
02兄，一定要继续, 有很多人在支持你 !
回覆刪除其實宜家所講既乜乜霸權, 物物霸權, 事實係咪真係D大財團去淘太D小商戶嗎?
回覆刪除消費者宜家會去街市買餸定去超市買?買零食去士多買定759?一D小家電壞了, 會去維持定去豐澤買過個新?由其係一D舊既個體戶商鋪, 真係有幾多消費者(特別係年青一代)去幫襯?其實佢地已經用左隻腳去投票, 令到D小商戶自然死亡, 換成其他新生命, 令到社會不斷進步!
歡迎加入討論 ^^
刪除呢種淘汰係自然淘汰, 定係由某d 霸權做成?
回覆刪除例如領匯咁, 要強迫小商戶跟足領匯既指引去裝修, 唔裝修就唔續租。一間舖頭賺唔賺到錢, 需唔需要裝修, 唔係應該由店主話事既咩? 用外力逼走小商舖, 引入大財團。屋邨居民只有接受, 我唔去百佳惠康, 仲有咩辦法? 好似蝴蝶廣場既美景超級市場咁, 佢唔係做唔住, 只係領匯逼走佢, 我唔知領匯發$寒定係覺得美景唔係連鎖店就逼走佢啦!
領匯用佢既影響力逼走小商鋪, 唔算係自然死亡啦, 係俾人謀殺,
點解d 人要去幫襯大財團? 因為根本無小商戶俾人揀
繼續發洩吧，現今社會處處充斥著怨氣，好多人都有怨無路訴，領匯是個很好的出氣袋。鬧領匯是一個門檻較低，而又較易煽情的發洩對象，盡情發放吧！
刪除賣廣告：O2有篇2012-04-11的舊文，題為《 出氣袋．領匯》
年輕人, 睇少D生果日報同動新聞, 留意多D社會發展, 積極面對!
刪除哈哈~~其實我都有咁嘅意思，只不過唔想寫得咁白，太hurt佢
刪除我睇咩報紙 同討論領匯有咩關係?
刪除就算文匯報都批評領匯加租啦!
如果我唔留意社會發展, 我又點知樓下個商場俾領匯接管左, D 舖頭變得更加唔似服務本邨居民呢?
積極面對? 樓下一間文具舖, 電腦舖都無啊! 鞋舖得返一間咋! 屈臣氏萬寧位元堂同埋其他奢侈品就多左啦
點解一定係只能服務本邨居民, 樂湖居及天慈的居民係唔係唔準過來幫趁, 你都有走過去新北江買嘢啦! 難道樂湖居的居民唔係香港人?
刪除當然, 任何人都可以0係屋邨商場購物, 正如屋邨居民都可以0係豪宅商場購物。問題係定位問題, 明明一個對象for公屋居民既商場, 俾領匯重新定位, 同私人商場一樣。咁唔係問題, 不過公屋居民本來有以佢為對象商場. 而家無左。
刪除本來去樓下有既廉價商品, 變左O2所講要去天秀墟先買到, 你話領匯係咪乞居民憎丫
世間本無事，庸人自擾之。地球每天在轉，世界每天在變，如果唔想變，可以留長條辮做滿清人，屋村商場亦在變，在領匯的努力下變得有聲有色，汰弱留強是很自然的事。
回覆刪除整個社會都要發展, 都要進步, 如果D社會棟樑早幾十年出世, 我相信香港仲會係漁村一個
刪除一樣米養百樣人，有人鍾意原地踏步，我地都冇符
刪除原本好既變差, 我情願原地踏步。傳統鞋舖變馬拉松、文具店變精品店、街市變超市, 本來空間感既地方變到商鋪密麻麻, 難道係社會發展既正確路向?
刪除汰弱留強? 而家D 舊舖未必係無生意, 只係領匯迫害/瘋狂加租先令到D 舖走人。 正如強姦案, 唔通你怪責受害人唔夠人地強, 先俾人強姦, 而唔係怪責罪犯點解強姦喇喎
回覆刪除你只夠膽講＂未必＂，即是你自己都唔肯定啦
刪除有D 舊舖係有生意而因為領匯加租/迫走
刪除這個世界只有數字是真的，你說瘋狂加租，你可否提供租戶原租金多小錢，領匯租金多小，外面市場租金又是多小。當你手上那到了3個租金，你自己比一比就會有答案
回覆刪除Link仔哥，你唔好玩佢啦，佢識計數就唔會講埋D咁嘅野啦
刪除你要數據求其search 都有... 但屋邨商場點解可以同市價比較? 兩樣客都唔同 我只比較同店舖加幅都驚人
刪除「多個商戶早前收到領匯通知新租金將上升五成至逾一倍不等，其中一間麵包店月租由$5萬加至$12萬，店主無力應付，昨日結業」(2012年)
「樂 富 商 戶 關 注 組 發 言 人 馬 麗 媚 表 示 ， 在 裝 修 期 間 ， 領 匯 以 每 月 臨 時 租 約 形 式 租 予 商 戶 經 營 ， 一 直 未 與 商 戶 商 討 續 約 及 遷 回 原 址 事 宜 。 至 上 周 ， 領 匯 代 表 才 與 個 別 商 戶 接 觸 ， 並 提 出 加 租 3 至 4 倍 。」(2008年)
「領匯又向屋村診所大幅加租達5倍，令很多診所結業，不能向居民提供廉價醫療服務。有經營診所的西醫表示，租金加幅超過三倍，唯有無奈接受。」(2009年)
另外, 你要數據支持, 係咪?
【新報訊】工聯會調查發現，受訪天水圍居民中，有75%認為區內商舖選擇不足，逾93%更認為領匯為求加租大事翻新商場後，區內普遍物價比以前昂貴；工聯會指調查反映區內不少基層市民正面對物價高、選擇少的困境，有多個屋邨商場的天水圍，被「領匯霸權」影響的情況不容忽視。
道理好簡單，如果你有間屋，市值租金一萬，你會唔會七八仟元租比人？如果唔明，可能智商有問題！
回覆刪除吓!? 你又要佢計數?
刪除補充一下：佢未必係ＩＱ有問題嘅，頂多都係ＦＱ低啲啫
刪除希望佢唔好以為我地針對佢…而係令佢可以係唔同角度思考，從而好好咁管理好佢自己！
刪除希望啦~
刪除你拎市值租金同屋邨商場比較?
刪除好似天耀邨同嘉湖山莊, 就2011年人口普查數據0黎講, 個人入息中位數都唔同. 天耀$9500, 樂湖$13500 , 差40%... 你攞私人屋苑同屋邨比較?
不如你話公屋租金遠低於市值租金, 所以房署大幅度加租都係無問題。市民無屋住, 只能怪佢地收入低?
任何人如果经常去商场，他应该知道, 領匯里面餐饮 (除了连锁店) 价格仍然比许多其他地方平均水平低一些。
回覆刪除嘩，你咁講好易惹起火頭，到時O2 blog又變成戰場了。定還是你想用激將法，引D領匯仇家去幫襯下（搏佢地因為未幫襯過唔敢反駁你）
刪除你想將屋邨商場同the one, iSquare, ifc 果D 比較?
刪除$15蚊盒飯我食過, $1500蚊既晚餐我食過..
咁又點? 屋邨商場毋論係個人收入中位數定家庭收入中位數係低過私人屋苑, 呢個係事實。 屋邨一個家庭收入中位數得$13xxx, 私人屋苑閒閒地由$23xxx 去到港島區六萬幾至七萬幾都有...? 咁有得比較咩?
是的，我应该停止发送此类意见。感谢提醒。
回覆刪除我諗你地領匯打手/股東都要睇下呢篇文
回覆刪除【新報訊】工聯會調查發現，受訪天水圍居民中，有75%認為區內商舖選擇不足，逾93%更認為領匯為求加租大事翻新商場後，區內普遍物價比以前昂貴；工聯會指調查反映區內不少基層市民正面對物價高、選擇少的困境，有多個屋邨商場的天水圍，被「領匯霸權」影響的情況不容忽視。
領匯接管全港屋邨商場後，各個商場猶如倒模一樣，被統一連鎖店化，店舖租貴種類少，幾乎壟斷了數以百萬基層市民的消費模式。工聯會社會事務委員會於6月初，就屋邨商場壟斷問題對市民構成的影響，以問卷形式訪問了近600名天水圍居民。
食肆收費較以往貴
結果發現，75%受訪者認為區內的店舖種類選擇不足；超過93%人認為區內的屋邨商場自領匯入主後，物價、食肆收費都較以往貴。
對於傳統的小店的存在價值，調查指出有超過82%受訪者表示現有的大型連鎖店並不能取代舊式的店舖，包括傳統的雜貨舖、士多、茶餐廳等。調查亦反映，有78%人認同若在現有的屋邨範圍引進小商販市集，能有助解決欠缺競爭的問題；有98%受訪者則表示，支持政府盡快制訂《公平競爭法》。
工聯會要求反壟斷
工聯會社委主任麥美娟批評，領匯不斷加租，店舖選擇少，是變相將物價推高的「元兇」，強烈要求新政府盡快推出一籃子反壟斷、利民措施，減輕市民的負擔。
工聯會要求政府應推動墟市及街道經濟，以及檢討小販政策，盡早落實興建食環署街市及熟食中心，平衡大集團壟斷。此外，又要求領匯暫緩加租，甚至要降低租金，使小商戶有生存空間，以免再推高通脹，令基層市民生活百上加斤。
你忘記咗天秀墟呀! 啲嘢好平, 你有冇每日都去幫趁呀! 還是你走咗去新北江wet, 走咗去銀座投注站落注, 咁你就唔啱啦! 呀!重有個天晴商場係房署嘅, 咁都叫壟斷?天恩商場啲租重平過頌富好多, 都係房署嘅, 就係頌富隔離, 每晚十時後, 嗰間銀龍茶餐廳食客小貓三兩, 但在頌富廣場嗰間就迫爆, 你話啲人係唔係傻咗, 麻煩你叫工聯會啲人去查吓!重有頌富街市就迫爆, 天恩嗰面就成日話唔夠生意做, 麻煩呀哥哥仔去調查吓!
刪除有一D團體做D調查, 基本上已經有既定答案, 例如問:係唔係覺得領匯商場D賣D野係唔係好貴; 係唔係想有地方賣D平野; 覺唔覺得有[領匯霸權] 等等等….跟住可能只係走訪左一千幾百人, 你可想而知出黎既調查結果會係D咩呢…
刪除不嬲頌富銀龍好食過天恩銀龍㗎啦！揾嚟講
刪除消費者的眼睛是雪亮的 ^^
刪除Chi Ho，謝謝你以上的多段留言，舒服點嗎？如仍然係未夠喉的話，可以繼續，O2願意開放此平台，讓你消消氣 ^^
回覆刪除支持O2對領匯的認真及長期報告, 尊敬O2對不同聲音的態度, 特此致意。
回覆刪除多謝你的支持！O2自幼住公屋，見證著屋邨商場在房署手中由盛而衰，再由領匯起死回生。
刪除我是真心認同領匯的經營理念，從而驅使我走遍香港、九龍及新界的屋邨商場。能夠見證著一堆噏噏耷耷的爛場轉化成街坊受落、多咗人行的正常商場，感覺是amazing的。
這裡以823 fans的聲音佔大多數，O2反而覺得Chi Ho是精神可嘉的，畢竟，做異見份子是須要付出更多，雖然大家意見不同，但O2也不忍見到他被人多蝦人少啊。
同意。02對不同聲音也大方应对和尊重。要謝謝他的認真及長期報告无私分享。
回覆刪除多謝！多謝！獨樂樂不如眾樂樂，O2非常樂意與大家一起分享我在領匯商場的所見所聞。
刪除