房署商場 搵老襯

(from Yahoo Blog)

2012年4月26日下午4:50｜公開｜累積瀏覽 232

細細個開始住喺柴灣, 四周圍都係公屋 (連居者有其屋計劃都未有), 自小已經幫襯屋邨商場, 因為無其他選擇。

小時候, 全柴灣只有一條由中巴營運的8號巴士線, 又未有東區走廊, 想由柴灣去銅鑼灣"血拼", 要行經柴灣長命斜→筲箕灣道→英皇道, 經常大塞車, 真係坐到pat pat 扁晒 &/or 企到腳軟都未到。嗰時未有冷氣巴士, 人多車少 (中巴服務太差勁, 後來政府加咗城巴, 迫中巴提昇服務水平), 車廂內迫到沙甸魚咁~

直至八十年代, 交通網絡改善後, 出入方便咗, 柴灣新翠商場又開埋, 已經唔使焗住幫襯房署D噏耷商場咯! 要去都去太古城中心, 康怡吉之島啦! (即是話, 不知不覺間已經廿幾年, 吼都唔吼吓嗰D爛鬼公屋商場。)

4年幾前, 睇住柴灣嘅公屋商場有D唔同咗, 變得更切合居民需要, 多咗人行, 變得似番個商場, 自己都幫襯多咗, 有次機緣巧合, 買咗些少領匯信託基金收息, 令我更加想了解多D呢間公司。去多咗領匯商場, 愈行愈有癮, 我又想比較吓仍然由房署自己營運嘅商場有乜野分別咯喎, 要知己知彼吖嘛!

近期觀摩過彩德商場 & 白田商場, 一個新, 一個舊。我慶幸柴灣嗰幾個公屋商場都係歸領匯! 去觀摩完之後發覺, 原來嗰兩個房署商場嘅消費, 並唔係想像中咁基層, 我覺得都幾搵老襯囉! 房署慷納稅人之慨, 收咁平租, 但係D商戶並冇回饋居民, 而係落晒自己袋, 咁我做咩要咁笨, 送上門俾你搵老襯呀!?

1982　太古城中心落成 (太古地產)
1985　地鐵港島線通車
1986　新翠商場落成 (新鴻基地產)
1987　康怡吉之島開業
1989　東區海底隧道通車
1989　東區走廊全線通車
2005　房署打包屋邨商場上市
2008　領匯陸續翻新柴灣區的公屋商場