(from Yahoo Blog)
2012年4月14日
正當領匯嗰個「尋老味」 Campaign 搞到全港網民熱血沸騰時, 我今日都去咗一個老味屋邨——麗閣邨。
一把年紀嘅麗閣邨位處長沙灣, 1981年開邨, 計一計, 有成31年咯!
由柴灣去長沙灣可以搭隧巴118 ($9.8) 或者港鐵 ($11.8, A1出口)。
到咗麗閣商場, 發覺人流量稀疏, 場面比預期中冷清, 同鄰近嘅西九龍中心相比, 簡直係蚊髀同牛髀。
麗閣商場 (地址：長沙灣東京街12號), 面積116,300呎, 1981年落成, 未經領匯大改造
商場有好幾個入口, 呢個入口近麗荷樓
麵包店係領匯商戶組合中的必然之選, 第1時間睇咗先......麥禾田餅店 (10號舖), 全店最別緻係呢張手繪宣傳海報
商場裡面有幾間街坊食肆。其中一間係明順海鮮菜館 (11-13號舖)
清香園茶餐廳 (14號舖)
寶華餐廳粥麵家 (17-18號舖)
麗閣商場冇麥當勞, 冇大家樂, 應該係某些「嫌棄連鎖快餐店人仕」的樂土。我幫襯咗寶華, 叫咗個快餐, 餐湯+豬扒意+餐飲 ($27)
漏網之魚......原來平台上仲有間新興餐廳, 喺麗荷樓互助委員會隔離
入番商場。地下走廊通道 (潔衣工房．20B號舖外)
上一層, 名符其實的十室九空 (101-107號舖, 總面積 3,556呎)
上多一層, 都係全吉 (201-204店舖, 總面積 1,272呎)
出咗商場, 行過去街市, 冇冷氣嘅, 不過地方算幾亁淨光猛
街市內的豐源茶行
街市通道, 主要係想影D吊燈, 吊扇 (A08號檔位外)
係未開檔, 還是已荒廢??
街市入口之一。一塊可能係由街市檔戶合資掛上的指示牌。 通道兩傍都有疑似「先僭建, 後規劃」的舊檔位。
檔口已經人去樓空。 左邊賣香燭, 右邊係報紙檔, 都想像到曾幾何時呢度有幾繁盛
舊式公屋設計多數係長條型, 座座相連的, 落大雨冇帶遮時都可以借路返屋企。近呢十年八載, 房署喺每個出入口都裝上大閘, 又請埋"食蕉", 已經唔可以自出自入咯! (麗閣邨．麗荷樓)
每個樓梯位都唔例外, 一樣係重門深鎖。忽然覺得當某些人抱怨領匯掃走「人情味」嘅同時, 又有冇諗吓連公屋都家家裝冷氣, 戶戶都閂埋門嘆冷氣時, 又點會好似舊時咁打開晒門同隔離個C9傾計聯絡感情呢!? 當小學雞都個個手執手提電話嘅年代, 仲邊有老媽子嗌破喉嚨叫落街, 嗌阿仔返屋企食飯呢!? (依家大聲嗌會俾人投訴"造成噪音滋擾" , 要扣5分架!!) 時移勢易了, 隔離鄰舍住上3,5,7年, 都分分鐘唔知佢姓乜。
科技愈發達, 人與人之間嘅關係卻愈疏離......唔好話乜, 連我呢個老鬼都用fb或者Whatsapp同人溝通聯絡啦, 甚至乎打電話講多句都費事, 人人都係耷低頭望住部電話起勢篤...篤...篤..., 大趨勢就係咁, 唔通呢D就叫有人情味?? 市場上不斷有新商場落成, 公屋商戶亦要面對私人發展商旗下商場商戶的競爭, 硬要領匯留住D虛無飄緲嘅所謂人情味, 樣樣野都50年不變, 等人得閒無事去懷愐吓, 係咪有D強人所難呢!? 有心留住D老店, 最現成嘅方法係由依家開始多D去幫襯, 唔好等到人地臨執笠最後1 day時, 至一窩蜂湧去玩集體回憶, 好嘛!!
返嚟咯.....返嚟咯.......睇吓麗閣邨各座的佈局。
向長沙灣道的邨口。
樓梯底有兩個舖位。Please Hair Salon (39號舖) , 咁嘅樣, 都唔知仲有冇做緊生意??
樓梯底另一間舖, 卡富友整體美容中心 (40號舖), 要留意係"整"體美容, 唔係"纖"體美容。
麗閣護老院 (21-26號舖), 以前是冬菇亭嗎?
麗閣邨對面, 建築中的長沙灣邨 (左), 及剛落成的元州邨第5期 (右)
商場正門向東京街, 見到外牆無啦啦有個「各」字, 有點摸不著頭腦, 再睇真吓, 至發覺原來牆上以牆磚砌出「麗」&「閣」二字。
入面都有.....以牆磚砌出嚟嘅圖案, 是房署時代的傑作嗎?
另一邊牆身都有類似嘅圖案。巡視完畢, 離開麗閣, 行過去元洲街, 食番兜幻彩明珠 ($17...貴咗), 透心涼。行程完滿結束, 之後搭118返柴灣。
＊＊＊
| 麗閣商場．商戶名單 @2012-04-14 | ||
| 地下 | ||
| 1-2 | 屈臣氏 | |
| 3 | 豐昌順校服公司 | |
| 4 | 彩絲髮廊 | |
| 7 | 西醫梁俊彥 | |
| 5, 6, 8, 9 | 意外康復關懷會 | |
| 10 | 麥禾田餅店 | |
| 11-13 | 明順海鮮菜館 | |
| 14 | 清香園茶餐廳 | |
| 15 | (吉舖) | 819呎 |
| 16 | (吉舖) | 797呎 |
| 17-18 | 寶華餐廳粥麵家 | |
| 19 | 導思教育中心 | |
| 20A | HSBC櫃員機 | |
| 20B | 潔衣工房 | |
| 21-26 | 麗閣護老院 | |
| 39 | Please Hair Salon | |
| 40 | 卡富友整體美容中心 | |
| 一樓 | ||
| 101-107 | (吉舖) | 3,556呎 |
| 二樓 | 二樓 | |
| 201-204 | (吉舖) | 1,272呎 |
| 街市 | ||
| A01-A06 | 大昌食品市場 | |
| 麗薇樓 | ||
| 1 | 君好海鮮火煱酒家 | |
| 2 | 樂悠居 | |
| 麗蘭樓 | ||
| 1 | 華潤萬家便利超市 | |
| 1A | (吉舖) | 1,561呎 |
| 麗萱樓 | ||
| 102 | 7-11便利店 | |
| 103-104 | 香港家庭福利會 | |
| 105-106 | 麗閣郵政局 | |
| 麗蘿樓 | ||
| 110-113 | 明愛麗閣苑-恩柏軒 | |
| 114-127 | 中華基督教會基真幼稚園 | |
＊＊＊
巡視業務．領匯．幸福商場 @2012-08-11 (re : 新水牌)
沒有留言:
張貼留言