出氣袋．領匯

(from Yahoo Blog)
2012年4月11日下午4:16｜公開｜累積瀏覽 332

領匯果然係「惹火尤物」, 一個原本普普通通嘅「我們的尋味時光」推廣活動, 最尾都搞到滿城風雨至收科。

我開呢個地盤嗰時, 只不過想KEEP低D報紙文章, 方便自己翻閱。偶然一兩段會寫吓自己野, 就當寫日記咁, 整整吓至搞到依家咁樣。自己雖然開宗名義撐「領匯商戶」, 但係就同坊間嗰D「鋤領匯, 撐商戶」嘅「中心思想」唔同, 我始終認為業主同租客係唇齒相依的...(我嘅睇法, 之前有寫過, 唔想寫完又寫)。

今次領匯"領嘢", 好多人都用嗰間所謂「麵包老店」嚟做例子, 怪責領匯加租狼死, 由5萬加到12萬, 迫走老店。我好懷疑, 究竟有幾多人知道嗰間俾人擺上檯嘅「老店」, 其實係講緊「東京麵包」呢!? 「有心人」用「麵包老店」嚟推進今次呢單野, 俾外間以為係有間家庭式嘅街坊老店受緊迫害。

都冇所謂啦, 領匯都慣咗俾人當做「出氣袋」架啦! 我明喎! 我作為草根, 亦感受到生活壓力......但我亦見證住領匯為公屋商場帶來朝氣, 為暮氣沉沉的爛商場作出改革。老實講, 某D坊間所形容嘅老店, 又有幾多個人真係去幫襯吖! 把口就講「懷舊」! 講「集體回憶」! 到要揞荷包買野時, 咪又係走去大商場! 走去連鎖店! 走去大型超市!!

一齊玩洗版, 無疑係可以出吓氣, 過吓癮, 真正幫D老店喺大集團的罅隙中生存, 其實係要靠大家真金白銀去幫襯; 而真正能吸引到顧客光顧的老店, 才有存在的價值, 點可以單單靠一個「老」字走天涯呢!?