歪理?

(from Yahoo Blog)

2011年8月31日下午4:50

 

我認為 "領匯壓抑了香港整體商舖租金的上升"。

 

我係「領匯」fans, 以下論調極可能會向領匯傾斜, 務請獨立思考。

 

以前「房署」經營的公屋商場如何不濟, 大家有目共睹, 連我呢個咁草根的公屋人都唔想幫襯。我係柴灣人, 已經離棄咗公屋商場廿幾年, 行街買野我會去「康怡吉之島」, 睇靚野會去「太古城中心」或者銅鑼灣區的商場, 去開筲箕灣會順便買埋平餸, 嗌我行公屋商場? NO WAY 啦!

 

2004年, 房署水緊, 要將D商場物業套現, 盧少蘭婆婆大聲疾呼, 說 "政府賤賣資產"。當時, 我只當作新聞一宗, 與我無關, 不痛不癢, 因為我都冇幫襯公屋商場咁多年, 所以冇乜感覺。試想吓, 那些連公屋人都唔行嘅公屋商場, 究竟還有甚麼存在價值? 唔係講笑, D商場真係睇見都唔開胃!

領匯上市後, 公屋商場擺脫了房署的公務員式管治, 屋企附近嗰幾個公屋商場, 亦漸漸有D野唔同咗。看著自己區內周圍的環境, 一日一日咁改善, 又那有不喜歡的道理, 有新商店加入, 街坊們會議論紛紛, 奔走相告。

 

居民對領匯不滿, 也是有的, 例如商場裝修, 日日用開的樓梯/扶手梯被封了, 居民要兜路行, 當然不滿啦, 陣痛過後, 當商場變靚了, 多咗野賣, 居民還是喜孜孜的。說到貨品貴了, 我倒認為在通貨膨脹下, 來貨貴了, 零售價那有不漲的道理, 難道其他地方的物價沒有上升嗎? 反之, 領匯引入了競爭, 讓居民有選擇, 豐儉由人, 商戶做不成獨市生意, 便需要以俱競爭性的價錢和服務留客, 計我話, 居民是得益者才對。當商戶能夠提供俱競爭力的價錢和服務後, 一些原本不願 "留區消費" 的居民, 也會回歸 (我係其中一個), 那麼, 商戶可以瓜分的 "餅", 整體來說是 "大" 了。能不能在這 "大餅" 中分一杯羹, 就要看商戶的造化了。假若一成不變, 仍然用幾十年前的生意手法套用在今天, 我倒想勸勸他們不如早點結業, 留點老本, 享享清福, 騰空個舖位俾其他經營者, 待居民有更佳購物選擇啊!

 

領匯為公屋商場帶來人流, 商人認為有生意做, 有利可圖, 亦紛紛投向領匯的懷抱。其他區我唔熟, 我只以柴灣區作例子:

 

一.　「三生金行」係柴灣區幾十年的老字號, 由柴灣邨14 (15?) 座搬到金源樓, 直至2010年放棄了金源樓的街舖, 成為領匯租客;

 

二.　「華興傢俬」這店更老, 起碼有50年, 現已由第二代打骰, 他們的宏德居分店, 亦於2010年搬到領匯商場。

 

領匯改善了公屋商場的營商環境, 令原本冇人吼的舖位, 及被房署長期空置的地方亦相繼租出, 變相增加咗商舖供應量, 基於供求關係, 理論上商舖租金的上漲幅度係會受到壓抑的, 否則目前的租金水平可能更高。

 

 

柴灣老字號「三生金行」金源樓舊址, 再之前在已拆卸的柴灣邨第14 (15?) 座經營

 

「三生珠寶」興華廣場店

 

柴灣另一老字號「華興傢俬」宏德居店舊址

 

「華興傢俬」環翠商場新店

 

環翠商場並未作大型資產提升工程, 領匯只花了少少心思, 已為商場增添了生氣