升級第2天

(from Yahoo Blog)

2011年8月12日下午5:08｜公開｜累積瀏覽 19

上屋搬下屋, 唔見一籮穀。今日係升級嘅第2日, 仲摸索梗升級版有乜野function唔同咗, 要適應吓, 以後寫網誌時要微調一下。

隨遇而安係我做人嘅宗旨,「上善若水」呢家野, 都係跟施老板學番嚟。不過, 要實踐都唔係話咁易, 仲努力緊。

依家D所謂「社會怨氣」, 我覺得唔多唔少都係D政棍搞出嚟抽吓水, 我地選D議員/區議員出嚟, 薪高糧準, 無非都係想佢地幫手搞好香港啫。點知佢地周不時都係為拗而拗, 大玩政治把戲, 拖慢哂香港嘅步伐。

D議員辦事處好似社會福利署分部咁, 搞到香港愈來愈「福利化」, 養到D人變大食懶, 乜鬼野都賴政府, 個個都攤大手板問政府攞錢, 已經唔再理「一分耕耘, 一分收穫」呢D老餅野。搞埋咁多福利, 香港嘅下一、二代遲早會自食惡果, 咪好似依家D歐美國家咁囉...

睇電視見到政府D宣傳短片, 都唔知好嬲定好笑, 天氣熱要多飲水, 提防中暑喎, 呢D都要政府提? 行山要著淺色衫, 冇咁易俾蚊咬, 又要政府提?  香港人呀, 我地幾時開始冇哂common sense得嚟, 又咁身嬌肉貴、弱不禁風架!? 明知泰國有騷亂都要去, 有事就要政府包機; 英國落大雪, 冇飛機返香港又鬧政府; 買唔起樓又鬧, 不如年滿18歲, 政府就要每人配給一個500呎嘅單位, 好唔好?

哎呀! 我又借提發揮喇!