(from Yahoo Blog)
2011年8月17日下午4:29｜公開｜累積瀏覽 77
「多做多錯, 少做少錯, 唔做唔錯」、「無驚無險, 又到5點」呢D潛藏嘅公務員生存之道, 大家都耳熟能詳, 我住咗公屋咁多年, 同房署職員打交道, 梗係見識過喇。房署賣甩咗D公屋商場之後, 成日都見到D區議員/主流報章抽「領匯」水, 究竟領匯係咪咁差呢?
今日行小西灣廣場, 行行吓忽然間出面落雨, 見到領匯D職員嗱嗱淋幾個人夾手夾腳, 鋪地氈, 擺 "遮袋" 架, 擺 "小心地滑" 牌出嚟, 拖地..., 分工合作；令我諗返起以前房署管理D商場, 天雨地滑時, 全靠那個無論好天落雨, 全天候貼喺度嘅 "小心地滑" 告示做擋箭牌, 一副「我已經提咗你喇, 跣親唔關我事」嘅姿態。不過公屋人都見慣不怪, 對房署/房署職員冇乜要求, 所以大家都相安無事, 跣親只會怪自己唔小心或者嗰日當黑。香港人好現實, 明知嘈嚟都冇用, 自不然會慳番啖氣暖吓肚好過。
另一case, 小西灣廣場近四樓Circle K (Shop 401) 隻玻璃門俾人整爆咗, 事發後兩日, 領匯已經裝番好, 俾著以前房署, 你都唔使旨意。房署職員只會即刻擺個 "工程進行中, 請勿走近" 告示出嚟, 如是者, —個月、兩個月、三個月過去咗, 都唔知等到幾時至會有人修理, 居民都慣咗架嘞, 都唔會對房署有乜野期望。
出面忽然間落雨, D職員即刻夾手夾腳, 鋪地氈, 擺"遮袋"架, 擺 "小心地滑" 牌出嚟
服務台前面, 貼咗D腳印仔, 引導排隊方向, 清清楚楚, 大家方便
提款機前面都有腳印仔
隻玻璃門俾人整爆咗, 兩日後, 領匯已經整番好
(網上圖片) 2011-08-15 蘋果日報
沒有留言:
張貼留言