另類指標

(from Yahoo Blog)

2012年2月29日下午5:05｜公開｜累積瀏覽 117

2004年領匯REIT籌備上市, 我覺得唔關我事, 一來我都冇幫襯屋邨商場好耐, 二來我又冇炒股票。

幾經風雨, 領匯2005年終於正式在港交所掛牌。

我係柴灣人, 以港島區嚟講, 領匯商場喺柴灣區算是頗集中的一區。2008年初, 眼見柴灣區的「小西灣廣場」、「興華廣場」及「環翠商場」 不斷轉變, 變得更貼近市場需要, 變得光光猛猛, 企企理理; 而唔再好似以前咁, 噏噏耷耷, 污糟邋遢, 自己都不期然多咗幫襯。

就好似彼得．林奇 (Peter Lynch) 的《逛街選股法則》咁, 見到領匯D商場多咗人行, 多咗人幫襯, 我都想分一杯羹, 於是分段買入咗D領匯房地產信託基金。

自始之後, 愈來愈想知道多D呢間公司嘅野, 於是由初初淨係行屋企附近嘅領匯場開始, 後來愈去愈遠, 去到其他區巡視吓自己盤生意, 整整吓, 仲索性將巡視時所見所聞寫喺網誌。以我有紀錄以來, 到目前為止, 已經巡過34個領匯商場。自從Yahoo Blog升級之後, 每篇網誌都有個 "累積瀏覽" 數字, 更加幫到我......我發覺呢個數字係同嗰個商場嘅受歡迎程度係成「正比」的。可以諗到, "累積瀏覽" 次數愈多, 即係代表嗰個商場就愈多人流, 就係咁, 竟然變咗我睇吓個商場旺唔旺嘅「另類指標」嘞。

自己區居民對自己的社區商場關心係正常不過的, 只要商場設施/商戶組合係MEET到居民嘅需要, 居民都樂意「留區消費」, 個商場有番生氣, 到時, 唔理係家庭式小商戶, 還是連鎖店, 都一樣受惠...... 其實連鎖店對社區都可以產生正面的經濟效益, 不過今日唔講住。

我嘅觀點純粹從居民的角度出發, 個別受影響商戶可能另有見解....畢竟, 以比例計, 居民是大多數, 所謂「受迫害」的商戶則是小眾。商戶要迎合到居民口味, 才能達到賺錢糊口的終極目標。時移勢逆了, 商戶亦應該與時並進, 呢個世界好現實, 要生存......請跟著居民的需要走吧~


(免責聲明：投資有風險，自己衡量，唔好跟人)