巡視業務．領匯．尚德商場 @2012-06-30

(from Yahoo Blog)

2012年6月30日

噚晚 "杜蘇芮" 仲喺度也文也武, 點知一覺瞓醒, 原來已經俾「李氏力場」彈散咗。

PopCorn喺2012-03-31開幕, 我仲未參觀過, 今日就去行吓, 順便可以巡視埋尚德商場嘅裝修進度。

今日車費支出：柴灣站→將軍澳站$12.5, 回程$10.5 (喺尚德商場嘟一嘟, 慳咗$2)

原來PopCorn有個tailor-made嘅港鐵站出口。港鐵為自己旗下商場製造地理上的優勢, 呢個安排好明顯改變咗人流嘅方向, 其餘嗰兩個出口依家都少咗人

 

參觀過PopCorn商場 (港鐵) 之後, 又順路睇吓將軍澳中心Park Central商場 (新地) , 兩個場加埋有幾大, 我就冇計過, 不過我係咁意兜咗個圈, 已經有少少腳仔軟。喂! 喂! 喂! 我仲要留力過去尚德商場巡視業務架!! 要歇吓腳先......至於呢D凳仔好唔好坐, 就見仁見智了~

由PopCorn過去尚德。離遠見到尚德商場, 除咗換咗兩條廣告banner之外, 都冇乜野唔同咋喎!

有居民自嘲將軍澳係「無街之城」。既然想有「街」的感覺, 就要懂得享受和融入大自然的定律, 預咗要「好天曬、落雨淋」 , 何必整個咁長嘅上蓋呢? 咁咪即係又要威, 又要戴頭盔? 如果種一排既可遮蔭, 又可以綠化環境, 兼夾方便散熱的鳳凰木, 會唔會冇咁翳焗呢?

到咗尚德商場。近巴士總站的商場入口, 光線幽暗, 絕對有改善的空間

入到商場, 呢個位竟然冇擺展銷檔, 少見喎, 唔通俾人搶晒D人流, 冇生意!? 我唔奢望會搶到人地D私樓客, 求其尚德可以保得住自己圍內嘅公屋客客源, 已經阿彌揭諦!

冇變過, 同上次一樣, 仲以為領匯會大執呢個位添~

商場地下的商戶 (富田和食亭．1號舖外)

防煙門

上咗2樓, 嘩! 有得分呀!! 乜好似螞蟻摟蜜糖咁嘅! (屈臣氏．201號舖外的車仔檔)

貌似街坊小店的高威 (204號舖), 我懷疑佢都係連鎖式經營, 印象中喺其他商場都見過同一招牌。順便睇吓翻新進度, 已經換咗防煙門, 同埋準備換新天花

賣小飾物的彩星屋 (245號舖) 隔籬, 新開咗一間叫VISAGE的時裝店

商場通道正進行更換天花工程, 呢條巷已經換好 (明誠教育．227號舖外)

圖左邊係做咗改善工程之後的舖面, 樓底都顯得高咗, 少咗D壓迫感 (一粥麵．239A號舖外)

上3樓, 扶手電梯頂都換咗新天花

3樓間酒樓執咗, 不過依家反而仲旺咗喎。原來開咗間百佳超級廣場 (301號舖), 試問誰能抵抗「地產霸權」!?

3樓出面有個平台, 唔知領匯會點整呢?

有幾間面向平台嘅舖頭。開露天茶座好唔好呢?

個平台都幾大吓架! 除咗露天茶座, 仲可以構思做乜野呢? 平台花園? 有機菜種植區? 兒童遊樂場? 露天市集? 燒烤場?

由平台望落街

大敵當前, 論商場, 尚德未必夠人揮, 不過講街市, 可能會有D贏面噃! 其他發展商商場只有大型超市, 如果要搵傳統街市, 始終都要過嚟尚德啦! 尚德街市承包商係＂利揚＂。我想反映吓, 以我嚟過尚德３次咁大把, 次次都見到有人喺街市門口無牌擺賣, 希望利揚 &/or 領匯要關注吓, 因為你地有責任保障番街市D檔戶嘅權益架嘛!

賣元寶蠟燭的三利行 (街市80-81號檔)。我要替佢抱不平, 事關街市門口有檔賣香燭嘅走鬼檔, 咁樣對正正經經租檔口做生意嘅檔戶好唔公平啫!

＊＊＊

　巡視日程表