屈機的星賤

(from Yahoo Blog)

2011年7月14日下午4:07｜公開｜累積瀏覽 114

 

如果有睇過我D舊網誌, 都知道我係買咗「星展毒債」嘅雷曼苦主。2008年9月雷曼破產, 星展銀行的「毒債」變得一文不值。從始亦展開了香港雷曼苦主與各銀行交鋒的序幕, 折騰咗 1年零10個月, 喺 2010-07-14, DBS星展銀行在「金管局」及「證監會」的壓力下, 迫不得已提出了一個「不承認責任」的賠償方案。

2010-07-14 晏晝, 接到一位「雷曼戰友」的來電, 佢話有「賠償方案」..., 吓 !? 唔係 6成, 又唔係 8成喎, 係百分百賠償喎 !? 我有點難以置信, 星展冇理由咁順攤o架, 儘管呢年多以來, 我不斷提出理據, 與星展銀行書信往來交涉, 來來回回不下數十次, 銀行方面都是擺出一副愛理不理的態度, 每次都只是以官樣文章回應：「... 調查結果是本行並無發現任何證據支持或證實閣下的投訴/索償 ...」, 無論我寫乜, 佢都係咁樣答我。

 

戰友收線後, 我立即上網 search 有關消息, 從一段簡短的電台報導得悉,「賠償方案」係要分 "高風險客戶" 與 "低風險客戶" 的, 啊 ... 好緊張呀, 究竟我自己係 "高風險" 定 "低風險" 呢 ? 快D摷番D野嚟睇清楚先 ..., 好好彩, 原來我係屬於 "低風險" 客戶, 根據「賠償方案」係可以獲得 100%本金另加利息的 ( 以該段時期該行大額存款利率計算 ), 不過仍然好擔心, 好驚自己睇錯, 咁就空歡喜了。這個「賠償方案」可謂令我喜出望外, 雖然法律上銀行沒有承認責任, 但事實上銀行是付出了金錢, 以及商譽損失的代價。

 

到今天, 我仍然不能將此事放下, 原因有三：

 

一．這種血本無歸, 一鋪清袋的事情絕對不能再發生, 我必須汲取教訓, 銘記於心, 絕不能重蹈覆轍 (一把年紀, 冇本事翻身了)；

 

二．替被評為 4、5級 "高風險" 的星展苦主不值。我可以以第一身的身份為這群被摒於門外的苦主說句公道話, 單憑那份「風險問卷」而定生死, 是極不公允的。那份所謂「問卷」相當粗疏, (雷曼爆煲之後, 我自己曾以最最最保守的心態重新填一次, 無論我點填也不會被評 1級的, 這是屈機之一), 而且職員填寫問卷時, 只當例行公事, 一點也不重視, 到了定生死的時刻, 才說那份問卷是「重要文件」? 這班客戶太無辜了。況且, 就算係 "高風險客戶", 也有權做自己的 asset allocation, 銀行職員sell 野時, 講到明D債券係穩陣, 屬低風險級別, "高風險客戶" 有權選擇整個 portfolio 裡, 各類產品佔多少比重啊 ! 點可以話 "高風險客戶" 買了 "低風險產品" 就冇得賠, 說不通啊 !!

 

三．就是我那位「理財經理」, 為求自保不惜講大話, 到了危難關頭, 也給我看清楚「人性的陰暗面」, 一個我曾經信賴的銀行經理, 你令我好失望 ... ( 至於嗰個「銀行經理」點衰法, 依家唔講住, 遲吓先再講 ... )

 

講到尾,「星展毒債」根本就係「屈機」之作, 整個產品設計, 無論係 "高、中、低" 風險客戶都係一樣 ... 死無全屍 !

 

註：非星展客戶唔知嗰間野的評級分類, 所以要解釋吓, 以當時計, 星展會將客戶分 1-5級：

 

5級	53分或以上	進取型
4級	42-52	增長型
3級	28-41	均衡型
2級	18-27	穩健型
1級	17分或以下	保守型

 

後記, 寫到七七八八, 要搵番個和解協議日期時, 至發覺原來今日係星展的「賠償方案」一周年, 又會咁蹺嘅!

 

 

2010-06-23 收到銀行封信話查過晒, 佢冇錯, 冇得賠；到 2010-07-14 竟然又可以百分百賠足, 仲有利息收添, 真係開心都嚟唔切

 

(網上圖片) 被星展銀行評為 4, 5級的「星債苦主」於 2010-07-17 在中環的標語 .

 星展