[爭地盤] 抗衡領展要齊心，做乜搞到鬼打鬼

 

 

何俊賢批評朱凱廸號召踩場，連累農戶。(設計圖片)

 

 
2017-05-30｜東方｜政情：墟市遭踩場累農戶　高佬賢鬧爆朱凱廸 (原文連結)

建制派同本土派喺議事廳經常駁火，但戰火竟然蔓延到社區。立法會漁農界議員何俊賢（高佬賢）同香港農業聯合會尋日舉行記者會，高佬賢指接獲農友反映，前日喺天水圍天耀邨嘅假日墟市首日開幕，但朱凱廸就喺社交網站號召支持者「踩場」，搞到班農戶冇生意做，該會仲譴責朱凱廸嘅做法係將民生議題政治化。但朱凱廸就反駁指摘，話請願人士只係表達訴求，做法冇唔妥。

斥民生議題政治化

香港農業聯合會話前日班請願人士阻塞通道並阻礙農戶經營，雙方發生衝突，令市民亦唔敢去墟市。該會認為若果朱凱廸等人對申辦墟市有任何不滿，應循合法渠道向政府爭取，絕唔應該為一己私利胡亂向小農戶發洩，批評佢哋為咗累積政治本錢，置農友同小商戶生計於不顧，影響農戶經營，強烈譴責咁嘅做法是將民生議題升級至政治事件。

高佬賢話農友前日朝早七點割好菜，打算到農墟販賣，但至約十二點，請願人士叫咪，嚇走街坊，街坊同佢哋講，話「我哋唔搞咁多政治嘅嘢，我哋買少餐餸好閒o架咋」，令到農友生計大受影響，不滿請願人士嘅做法，又話「到底邊個被騷擾呢？佢（請願人士）拉住條banner（橫額）話嚟買餸」，又聽到反映指「我攞住條banner（橫額）嚟買餸唔得咩」，質疑嗰個請願人士嘅態度引致基層市民同佢衝突，對於朱凱廸嘅行為感到非常失望。

高佬賢認為請願人士若對事件有不滿，希望表達訴求，有合理嘅權利，但佢哋選擇嘅地點錯誤，唔應該衝着小農民、小商販，影響佢哋嘅生計。

朱聲稱做法冇唔妥

面對指摘，朱凱廸回應話當時佢唔喺現場，請願活動係由基層團體主辦，以佢所了解，當時係有商戶搶去請願人士嘅橫額，之後就有警方介入。佢認為呢種表達方式冇必要，因為請願人士示威嘅對象並唔係商戶，而係房屋署，佢哋希望爭取有公平機制，申請舉辦墟市嘅場地。佢又指請願人士只係表達訴求，做法並無不妥。

對於請願人士應否喺墟市表達訴求，朱凱廸認為並非商戶批評唔應該就係唔應該，「有咩理由話佢哋唔應該去講嘢，佢哋只係講嘢，做過啲咩呢」，質疑係咪太過上綱上線。
 

 

－ － －

 

圖片來源：文匯報

 

＊＊＊

　

埋嚟睇、埋嚟揀：

[剪報] 元朗農墟向區議會交Proposal　建議在天耀邨露天劇場搞墟市 (自2017-03-06起跟進)
[領展商場] 天耀廣場 @2017-03-11 (圖#5-9 露天劇場位置)
[領展商場] 天耀廣場 @2017-05-20 (圖#2-15 天耀街市舊址新貌)