(from Yahoo Blog)
2011年9月15日下午5:59｜公開｜累積瀏覽 330
好唔抵得政府部門咁浪費資源, 噚日睇到關於「柴灣青年廣場」嘅報導就覺得好肉赤, 我情願政府將D錢嚟幫助真正有需要嘅人, 好過咁嘥法。
所以呢, 政府賣甩D公屋商場, 其實係「德政」嚟架! 有人話領匯 "賺到盡", 雖然係有貶意, (不過嗰D政棍講嘅野, 要自己過濾吓至好接收), 我反而認為做生意唔同開善堂, 邊個唔想賺到盡, 只要係合法, 冇傷天害理, 又有乜所謂......(就算係開善堂, 都要諗過度過, 要善用每一分一亳善款喇~)
我敢寫包單, 被淘汰出局嘅商戶已經係不合時宜, 咪俾居民/消費者離棄囉, 就算唔收佢市值租, 佢地都係慢慢陰乾, 唔捱得幾耐。嗱, 好似依家啱啱開學, 學生哥要買運動鞋, 問心講, 你會唔會帶個小朋友去街市檔買「白飯魚」去上體育堂吖!? 領匯請走D「冇人吼」嘅商戶, 租番俾符合居民需要嘅商戶, 俾居民多D選擇, 有乜野唔妥??
有日, 我同領匯某小商戶S吹水, 發現領匯D舖原來係 "唔憂租" 架! 話說小商戶S原本係租開柴灣街舖, 眼見有 "行家" 入咗領匯場之後, 做得唔錯。有前車可鑑, S亦趁自己租約快到期, 而謀定後路, 向領匯打探吓租務情況。S想租小西灣商場D舖, 但係領匯回覆佢話冇位, 要等喎.....佢等咗一排, 領匯要等到有舖位租約期滿, 至俾到舖位S...。小商戶S依家喺興華廣場 & 小西灣廣場都有分店, 見佢都做得唔錯。
哎...離晒題添, 言歸正傳, 講番賺到盡......領匯真係賺到盡架, 以小西灣廣場為例吖, 明明出租率已經係100%, 佢仲可以發掘到D地方嚟出租, 點到你唔服!
小西灣廣場內「君臨酒家」門口的空位, 啱啱租咗俾「賞金店」
領匯租到唔夠地方租, 連原本「客戶服務台」個位, 都攞出嚟租埋俾「 紹香園」, 想唔話佢賺到盡都唔得喇
仲有廣告燈箱收入呢
4樓呢個大廣告位俾「冒險樂園」租咗
個商場多咗野睇, 附近居民都多咗個地方行吓
沒有留言:
張貼留言