信唔過

(from Yahoo Blog)

 

2011年9月14日下午5:21｜公開｜累積瀏覽 72

 

「賓架信唔過, 點算?」係今日《信報》專欄「投資者日記」 嘅標題。文章內容提到 "銀行是一個講「信用」的行業, ......... 賓架不再牙齒當金使, 連誠信也告破產, .........?" 我有深刻嘅體會,「星展毒債」一役, 給我一個近距離睇清楚那個銀行Sales W小姐的真面目。

我係驚青一族, 多年來都只存港元定期, 我唔想有exchange risk, 所以連外幣定期都唔做。任那W時不時向我推介甚麼高息掛鈎存款, 甚麼基金, 我都冇騷佢。我向佢表明, 我只想穩穩陣陣收點利息就算。2007年03月02日, 又收到W小姐的推銷電話, 推介了年息5厘的債券, 每3個月收一次息, (好多指責雷曼苦主輸打贏要嘅人以為好高息, 成日話班苦主貪心/抵死), W講到明債券到期一定會100%取回本金, 又可以做港元, 完全冇匯兌風險, 佢仲同我講過, 如果見到月結單show 出嚟個value係少過100%都唔使理佢架, 呢D債券係咁樣, 佢地賣咗好多年架喇, 叫我一路揸到到期, 就可以攞番晒個本金咁話添, 佢講到實牙實齒, 仲話呢D債券已經賣到第70幾個series, 唔係新野, 好多人都做過, 叫我唔使驚喎..., 就係咁, 我就上咗隻賊船嘞....

 

咁都不特止, 雷曼爆煲之後, 我向銀行取回當日嘅銷售文件副本時, 仲俾我發現W私自改過我份「風險評估問卷」添, 太豈有此理喇。 W係C9 sales, old seafood一名, 好清楚分行閉路電視嘅佈局。當我質問佢時, 佢死口唔認, 又諗定D理由嚟辯駁, 一時話自己做咗咁多年銀行, 唔會做埋D咁嘅野; 一時又好得戚咁話, 就算閉路電視都唔會影到..., 一副我一定奈佢唔何嘅姿態。領教過W小姐嘅賴皮技倆之後, 我至醒覺, 原來「道德淪亡」呢4個字, 已經喺銀行界萌芽生根~

 

 

見到今日《信報》專欄「投資者日記」 嘅標題「賓架信唔過, 點算?」, 令我想起那超級賴皮的 C9 Sales W小姐 =(