我在銀行中伏

(from Yahoo Blog)

2011年6月14日下午4:41｜公開｜累積瀏覽 112

 

依家好多人都周街影相, 我都一樣, 因為實在太方便了。有網友問起 : 「喺商場影相, 唔驚俾 "食蕉" 話咩 ?」

呢個問題, 令我諗番起年幾前某日, 接到一位雷曼苦主嘅電話, 叫我一齊去柴灣星展開花喎, 我即刻問佢 : 「驚唔驚架 ? 會唔會俾人拉架?......嗱, 講明先呀, 我只係想多個人頭去壯吓聲勢架咋, 我唔會幫手搞事架......, 咁你去我就去啦 !」講咗一大輪事先聲明, 卒之都去咗。

 

講真, 咁大個人, 我都係第一次參與呢Ｄ活動咋 ! 去到銀行, 我都係坐埋一邊, 純粹唸住壯吓聲勢架咋。嗰日大約有 20個苦主出動, 其間有人攝錄, 又有人影相, 個個都攞住自己部機嚟影。橫掂都係坐喺度冇野做, 咁我都用手機學人影吓喇, 留住歷史性的一刻吖嘛 ! 影影吓, 有個 "食蕉" 阿頭走埋嚟, 話唔准影喎, 我本能反應地熄咗機, 跟住問佢 : 「點解呀 ?」

 

如果佢好聲好氣, 我都算喇, 弊就弊在佢兇神惡剎呢, 佢話喎 : 「係銀行嘅 "附例" ... 」。我叫佢俾Ｄ所謂 "銀行附例" 我睇, 佢又攞唔出喎。我心有不甘, 但係又覺得同Ｄ咁嘅 "食蕉" 嘈都係盞嘥氣, 就入咗經理房搵分行經理投訴, 連個分行經理都唔知有 "銀行附例" 呢回事, 你話嗰個 "食蕉" 係咪「虛假陳述」吖。後尾我再自己寫信 black & white 咁向銀行投訴嗰條友添 !

 

我不嬲都知道, 喺銀行分行口頭投訴係冇乜用嘅, 佢地但求息事寧人, 唔想俾上頭覺得間分行少少事都搞唔掂, 盡可能都唔想落 record, 總之耍到個客戶走, 就阿隬陀佛。如果間分行多投訴紀錄, 對個分行經理嚟講係一個 black mark 嚟架嘛 !

 

關於星展賣毒債券呢單野, 究竟誰是誰非, 我仲有好多野想講, 不過留番下次有心情先喇...

 

 

我就係喺呢間野入面, 俾個銀行職員點我買Ｄ"毒債券", 搞到雞毛鴨血

 

就係呢個 "食蕉"。佢俾人放咗上 YouTube 咋, 唔關我事架!