(from Yahoo Blog)
2011年6月8日下午4:28｜公開｜累積瀏覽 91
平時行「小西灣海濱長廊」都唔會影相, 因為多數係一片灰朦朦, 影出嚟嘅效果好差, 今日天色算唔錯, 至有興緻影番幾張。
呢個景同「藍灣半島」全海景的單位景觀一樣, 有時我會諗, 上面D業主捱生捱死嚟供層樓, 而我就可以免費享用同一個view, 都幾 "So"。
而且有D人為咗供樓, 打份工每日做十幾個鐘, 返到屋企都係即刻撻上床, 都冇我咁嘅閒情逸緻去欣賞海景喇! 仲有呀, 淨係管理費都要成$1.6/呎, 已經夠我交租, 認真唔化算。
所以我好贊成政府起多D公屋架, 等人有個安居之所吖嘛! 但係又唔使好似依家咁, 將D公屋搞到好似福利政策咁.....政府可以收番高少少租架。就以我為例吖, 每個月交嗰千零蚊租, 仲得閒無事又有得免租免差餉, 真係搵掘頭掃把掃我都唔走呀。就算話要我交double, 我都覺得抵到爛, 房署可以有多D資金嚟起多D樓, 縮短公屋輪候時間, 幫政府紓解民怨, 到時嗰D乜野大學生一畢業就申請公屋呀, 乜野無殼蝸牛/劏房/板間房/籠屋問題呀, 統統都迎刃而解, 香港人又唔使日日朝思暮想, 計住自己層樓值幾錢, 可以留番D精神做D有益有建設性嘅野, 何樂而不為呢?
癡線, 我做乜扯到咁遠呀!?... 唯有改咗個標題啦~
「小西灣海濱長廊」望鯉魚門
「小西灣海濱長廊」望將軍澳
「小西灣海濱長廊」望藍塘海峽
「小西灣海水抽水站」旁遙望藍塘海峽
好悶呢? 係咪張張都咁上下呢? 買海景單位都係睇呢D架咋, 咁你仲會唔會窮畢身嘅精力去買海景樓呢?
沒有留言:
張貼留言