明珠餅店 @翠灣邨

(from Yahoo Blog)

2011年1月31日下午4:31｜公開｜累積瀏覽 150

 

好似咁耐都冇寫過翠灣邨嗰檔麵包舖, 就今日寫喇。因為之前小西灣廣場「大井麵包餅店」(地址：小西灣廣場311號舖) D菠蘿包賣$2, 而翠灣呢間「明珠餅店」(地址：柴灣翠灣邨商場4號舖) 賣$2.5, 咁緊係幫襯大井多D啦。不過, 自從今個月頭起兩間都係賣$2.5咯喎, 咁就是但幫襯邊間都冇所謂啦!

其實「明珠」D麵包食得過架, 敝在個舖位太隱蔽。睇番個商場水牌, 至記番起佢嘅上手叫「翠灣餅店」。易手俾「明珠」時, 佢地擺咗個易拉架, 標榜個師傅係「聖安娜」嘅麵包師傅, 唔經唔覺都做咗幾年嘞, 都儲落一班街坊客 (包括我呀)。可能因為佢哋用D靚D嘅麵粉, 所以款款麵包都好好食, 椰賓, 芝麻包, 豆沙菠蘿, 雙腸熱狗, 鮮奶球, 香蔥包…都係我經常會買嘅, 特別推介佢哋嘅「英式方包」, 點好食法我真係唔識形容, 唔通話好有麵包味咩? 想感受吓就自己買嚟試下, 都係$3.5銀錢半磅之嘛~

 

 

明珠餅店 (地址：柴灣翠灣邨商場4號舖)