創藝墟 - 本地原創手作市集 @柴灣青年廣場

(from Yahoo Blog)

2011年1月29日下午5:17｜公開｜累積瀏覽 326

 

今日經過柴灣青年廣場 (地址：柴灣道238號), 見到佢哋啱啱搞緊個「創藝墟 - 本地原創手作市集」嘅開幕禮, 嘉賓有張繼聰。好可惜, 場面有少少冷清, 人頭多數都係工作人員同埋預先安排的採訪媒體。

呢個位置本來係「柴灣社區會堂」, 拆咗之後, 幾經風雨才重建成「柴灣青年廣場」, 初初見佢起得咁靚都有D憧憬架, 諗住柴灣卒之都有座見得吓人嘅地標啦。點知希望愈高, 失望愈大。個場地設施係由「新世界」管理, 佢哋就成日驚死人哋搞佢D嘢, 擺正個警崗喺扶手電梯口, 個「食蕉」又眼望望, 超趕客, 起初想上去「賞食新天地」做吓新屎坑, 都俾佢哋嚇窒, 不過依家好咗D喇 (鬼咩, 你唔歡迎人上去, D租戶邊有生意呀, 唔咋你哋型就有鬼)。仲有呀, 近「裕記」嗰邊, 鋪晒草皮, 佢地又係唔鍾意人哋踩D草皮喎, 成日同D公公婆婆鬥法, 防止人哋坐D長椅。

 

其實又唔怪得晒新世界嘅, 個深層次問題在於呢座嘢嘅設計...

 

．塊草地嘅分佈, 都幾違反人性, 冇理由要避開個草地, 兜個大圈嚟行架!? 正所謂「路是人行出來的」, 如果你唔想人踩到塊草皮, 咪跟番住條人路嚟改D通道, 俾番條路人行咪得囉；

．入到去個廣場, 好似入咗個迷宮咁, 周圍都黑蚊蚊, 又冇人, 都咪話唔驚

 

講番呢個「創藝墟」吖, 希望嗰班後生仔女唔好抱咁大期望, 雖然個場係好近港鐵站, 有地利, 不過個場係「民政事務局」睇嘅, D官耍官腔就叻, 點識做生意架, 有人肯上嚟睇吓你哋D大作, 你哋都偷笑, 唔好諗住會好好賣呀!

 

 

張繼聰：「支持本地原創，支持創藝墟 - 青年原創手作市集@青年廣場。」