總瀏覽量

2016年12月7日 星期三

[好文共賞] 阿「小店膠」,佢話你呀!

「小店膠」的神邏輯 by 千頌C (蘋果原文)
 
  
【蘋果日報】「香港人撐小店!」呢句口號每隔一輪,就會有人嗌!不過,自從「小店膠」嘅出現,搞到我好慘,又係我,阿James。
 
最近唔知邊個天才,Facebook list out晒美心、大家樂(341)、太興、稻香(573),話係旗下餐廳名單,話名單上大部分餐廳,都係「又貴又難食」。

「阿怡,一陣我地去Cova食tea好唔好?」「正呀!Cova好食喎!」阿怡有N個專為甜品而設嘅胃,我知實冇死,點知⋯⋯「呀⋯⋯都係唔好,我上網睇話Cova都係美心,畀咁貴食美心,你話係咪好灰先。」「但佢哋用都用都唔同料啦⋯⋯」「唔理!總之大財團就唔食!」
 
原來一個Post,就瞬間將港女名物COVA,變成果腹嘅美心西餅。呢一刻,我更加明白點解港女語錄應要打壓;點解美國人係咁嘈Mark Zuck縱容假新聞,因為⋯人類真係唔思考!
 
睇吓份「舒特拉的名單」,當然,我認為唔好食嘅都有,但聯營嘅The Cheesecake Factory,有;日日排隊排到傻嘅茶木,都有!連北京樓,都出現!
 
一個有常識嘅人,無理由今日先知唔少品牌都係幾個集團揸住;而一個正常讀過吓書嘅人,都知唔少海外品牌進攻海外市場,都會揾當地品牌合作,令事半工倍;又一個有正常觀察力嘅人,都知品牌為吸納唔同客戶群,會有唔同Line唔同檔次嘅副牌。
 
「吓?北京樓原來係美心?咁即係好似美心咁難食啦?但收貴咁多,唔食啦!」呢啲神邏輯,大佬呀,如果係咁,美心一早好似北京樓拎咗米豬蓮啦!好唔好食,竟然唔係憑自己味覺判斷,而係睇集團大定細?喂!你真係維基百科當飯食喎!
 
最好笑係,你問佢點解要罷食名單上嘅餐廳,「因為大財團囉」點解要反大財團?「因為要撐小店」。多謝晒。喂!東江水來自國企粵海投資(270),唔好飲啦!
 
大家唔鍾意領展(823),係因為佢對小商戶無情無義,忽略社區需要,唔係因為佢係大財團;
 
唔鍾意翠華(1314),係因為佢啲嘢唔值個價,唔係因為佢係大財團;
 
唔鍾意大家樂,係因為佢對員工太刻薄,唔係因為佢係大財團;
 
無論大集團定小店,如果犯以上罪名,都應鬧則鬧;做得有心有質素有品嘅,就應讚得讚。又,識一個茶餐廳老闆,你諗住佢小本經營呀,但啊老闆係儲法拉利,冇錯,係儲!
 
係嘅,香港唔少小店,已經喺癲價租金下,俾人踢出局;係嘅,好多高質素小店係好慘;係嘅,我都鍾意幫襯小店,報紙檔、餐廳仔、茶記⋯。不過撐還撐,人類可唔可以有質素地撐。
 
香港,應該係大集團小商戶並立,依家大家係要諗點幫到有質素嘅小店生存,而唔係指名道姓,針住一兩個大品牌有理無理吹雞:「大集團,有原罪!罷食!」 撐唔一定代表要反,盲目無的放矢為反而反,出師無名,對香港無功,但只會為人口實。
 
既然阿怡話唔食Cova,我決定就佢:「怡,下星期周年紀念,我book左中環Amber。」怡呢個時候心心眼,佢成日話貴一貴都要食一次,「不過,大財團嘢,你唔岩,我哋都係食返樓下間茶仔算。」
 
By千頌C@堆填區

5 則留言:

  1. 其實呢D小店膠同抗日膠一樣,因為日本仔幾十年前侵華,所以唔用日本牌子電飯煲,日本車,日本手機,接待日本旅客,雖然背後仍看日本AV
    容許我粗俗一點説,其實此等膠民實際是戇膠膠...

    回覆刪除
  2. TKO Gateway
    W008-W009 大師傅粥品 暫停營業 (裝修)
    W106 名鑽軒 即將進駐
    W107 & W109 Baleno 即將進駐
    W129 K-Zone 已經遷出,還原工程進行中

    回覆刪除
  3. 再極端少少,港鐵公司背後係政府喎,唔好坐啦,坐巴士啦。

    咦,九巴背後係新鴻基,新城背後係新世界架喎,一如唔好坐。

    你會發現,除了小巴和電車,基本上係寸步難行架。

    回覆刪除