風高浪急

自2008-01-07開始, 與823結緣足足8年了, 經歷過金融海嘯、全球量化寬鬆, 到現在步入加息週期, 加上近日Made in China的股壇跳灰士大龍鳳, 試問邊個唔嚇到心都離。

O2由08年時驚驚青青地買咗少少823, 之後在柴灣區內目睹幾個823場的變化, 到開Blog記錄巡視業務期間的所見所聞, 再發展到各方友好在敝Blog裡交換823情報。

自問是投資小學雞, 甚少鑽研股票分析&/or投資心法, 死攬住823乃由於日常接觸得來的個人感覺, 絕無技巧可言。

還記得初頭幾年的823上落不大, 吽吽呌呌咁, 只在臨公佈業績前一兩星期才會郁一郁, 跟住又定了下來, 而O2每次都是等到有5厘息或以上, 便出手入貨。

以前很多基金經理因為本身受基金章程所限, 就算明知823是好嘢都唔買得, 但自從823被加入多個指數後, 形況便變得不一樣。
  

  

成員指數

(領展官網原文)

  

除了我們這群小散戶之外, 很多退休基金、ETF、UT等, 都是823的持有人。

近日風高浪急, 一般的UT因為要準備應付投資者的贖回, 須要沽出手持的股票, 從而令823的波幅比以前大, 這是可理解的。

但O2這類死硬派, 揸住實物股票, 家陣用緊嚟墊櫃桶底, 想沽都唔係話咁易, 但唔知其他只須要在手機篤兩篤, 就可以沽貨的小散戶們, 會否被震散呢?

咁啱, Link仔哥今日也炮製了一劑心靈雞湯《房託基金ABC》送給一眾戰友, 看來O2已經與Link仔哥心靈相通了, 哈哈。