美蘭湯料包專門店

Candy鄭漫玲　25歲　美蘭湯料包專門店老闆

 

2013-08-30｜飲食男女｜第944期｜撰文：李明潔　攝影：李日進　美術：鄭永豪

 

年輕有夢：因為愛

 

跟Candy談了半天，覺得她真是特別的女子，特別在，她的價值觀，與現今女子，有太大分別！

 

首先，她黐家。

 

再者，她有office工不做，寧願留在街市工作。

 

才25歲，已有明確事業目標，有想法，沒半點公主病。

 

她哈哈笑地說，這不過是因為她有一個很特別的家——一個零舍溫暖的家，作為後盾。

 

Candy與家人的關係，親厚得緊要。

 

「由細到大，阿媽都好信我。試過一次，我同表弟落樓踩單車，撞到人，個女仔的媽媽，不斷鬧我哋，其實我哋無做錯！阿媽過來，聽完我講，就同個女人講係佢錯，唔會懷疑我講大話，所以我自細就好信阿媽，好聽佢話。」

 

但當她真的做錯時，絕不姑息，叫她跟人道歉，回家藤條侍候。「但佢從來唔會喺外人面前打或鬧我。」

 

所以，她很疼惜媽媽，知道媽媽樣子腍善，易俾人蝦，「我同細佬陪媽咪落街時，會偷偷收埋把勞工鉸剪，有壞人，即刻保護媽媽！」Candy哈哈大笑的說。

 

不止媽媽，爸爸也極寵她們。總問她們姐弟仨，夠飽嗎？夠暖嗎？街坊見狀，說了句：「第時你個女要嫁，睇你點算！」爸爸竟立即雙眼通紅，眼淚在眼眶打滾！

 

但這一家，不溺愛孩子，「人人都要做家務。阿媽會話：飯人人都有份食，個個都要幫手！」

 

「我屋企，就好似『我們這一家』咁，好溫暖。」

 

所以，當母親在她中五時，要到大埔街市的湯包店打工，她又跟著去。放學後去，放假又去，私人時間全沒了，也心甘情願！

 

「同學放學去街，我唔去，漸漸發覺自己少朋友，係好似少咗樣野，不過，都係屋企重要！」

 

為幫媽媽，她讀書有空檔，自動報讀中藥課程。「媽媽一直係家庭主婦，出來做嘢，梗係怕！有人問啲湯點煲，嚇到我同阿媽你推我讓，唔敢答！」但讀過中藥後，脫胎換骨，時常興高釆烈與媽媽討論草藥知識，又跟客人多了交流。

 

「祛濕止咳，飲五指毛桃啦！好香椰子味，好易入口！」

 

「雪梨雪耳湯，加豬展就清啲，想濃味加西施骨啦！」Candy琅琅上口。

 

客人覺得她們專業，態度和善，用料又靚過人。像豆子，逐粒揀走蟲蛀了的，煲湯才不會苦。淮山又揀不經硫磺燻過的，湯就不酸。「阿媽教落，湯料一定要靚！唔係煲咗兩個鐘，唔好飲，好嘥㗎！」一間小小湯料店，口碑愈來愈好。但她們也有惡死的時候。

 

「媽咪好腍善，有啲客話佢，佢一定啞忍，我會忍唔住，你鬧我阿媽？我一定話番佢。」

 

掉轉頭，有客人難為Candy，善良的媽媽也變哥斯拉！「咁小事，你番屋企自己整咪得囉！」一句罵退奄尖客。兩母女，為對方都可以變臉！

 

後來畢業，Candy在外面找到工作，但她照舊一有時間，立即回鋪幫忙，其時的男朋友也曾投訴。「佢會話：吓，又唔出來呀……，佢唔滿意都無辦法。屋企人養到我咁大，我幫屋企好應該！」

 

Candy見大埔店只能經營到明年初，不繼續可惜，於是有了新的打算：另開分店。

 

她暫停全職工作，在街市搵鋪開店，開展新計劃。

 

媽媽卻不贊成。「佢話廿幾歲就踎街市？佢唔想我咁樣。怕我困身，識唔到男仔。」

 

Candy覺得媽媽說的，不無道理，可是她想，現在打拼，賺到錢，「阿媽就可以早啲退休！」

 

而且，「時代唔同啦，街市依家好乾淨，有冷氣，唔同晒！」

 

媽媽見她如此肯定，也支持女兒決定。油塘店鋪位窄長，轉身也不能，街市冷氣，間中壞掉，熱得Candy面頰紅卜卜。

 

「已經儲到一班熟客，有人飲完湯，第二日來多謝我，好大滿足感！」Candy撥著扇，笑瞇瞇的說。

 

又有人讚她態度好，待客如對家人，「都係學阿媽，佢點對人，我咪點對人囉。」

 

外人看來，她為家庭，付出良多，卻看不到，她與家，其實一起進步，誰give誰take，哪說得準?

 

 

美蘭湯料包專門店｜油塘鯉魚門廣場地下光亮街市24號鋪