星展銀行．柴灣分行．關門大吉

(from Yahoo Blog)

2011年12月12日

星展銀行柴灣分行, 由2012-02-13起將會同鰂魚涌分行合併。我曾經喺呢間銀行中伏。

當年喺道亨銀行文咸東街總行開戶口, 都幫襯咗呢間銀行幾十年咯, 由「建利道亨」開始, 睇住佢賣過幾次盤, 經歷過幾次銀行擠提、87股災、97亞洲金融風暴、08金融海嘯。

道亨銀行柴灣分行係銀行嘅自置物業, 位於柴灣道350號樂軒臺地下109- 119號舖, 約1995年開始營業, 當時銀行業仲係以存貸業務為主。2001年被新加坡DBS集團以高價收購, 後改名為「 星展銀行」。

DBS入主後, 經營策略亦漸漸轉變。某次, 因有定存到期, 去柴灣分行辦續存手續, 有銀行職員忽然間話assign咗理財顧問俾我喎, 之後, 不斷 SELL, SELL, SELL, 由初頭SELL吓信用咭, 到後尾猛落咀頭SELL投資產品, 總之見你戶口有少少錢都會叫你搞呢樣、搞嗰樣。

D理財顧問一日到黑冤住晒, 我一路都冇睬佢地, 2007-03-02, 個師奶SALES又打電話嚟冤, 吼住我有筆定存就快到期, 佢話有隻野好啱我呢D唔想take risk嘅客戶, 好穩陣架 (下刪數千字)............., 到2008年中秋節, 雷曼執笠, 除咗金錢損失外, 那被騙, 被屈為輸打贏要, 那種含冤受屈, 有冤無路訴, 徬徨無助的感覺, 實不足為外人道。

中過你計, 吃過了苦頭, 我以後還會信你嗎???

星展銀行貼出啟事, 2012-02-11係柴灣分行的LAST DAY, 由2012-02-13起會與鰂魚涌分行合併。

位於柴灣道350號樂軒臺地下109- 119號舖的星展銀行, 客戶以長者及家庭主婦居多 (即所謂受保護客戶), 就算o氹到佢地買 "毒債" 呢類野, 最終銀行都要嘔凸賠錢, 呢班客戶群已經唔再係星展嗰杯茶。

隔離101-108號舖原本係廣安銀行, 被DBS收購後, 再與道亨合併

(網上圖片) 2011-12-08 仍然有雷曼戰友, 鍥而不捨地上街抗議