天時．地利．人和 @藍灣廣場

(from Yahoo Blog)

2011年11月24日下午5:39｜公開｜累積瀏覽 240

 

藍灣廣場係信和旗下商場, 2001年落成, 近年漸露疲態, 出租率有走下坡的趨勢。

商場成敗, 基本上取決於天時/地利/人和, 就我所觀察, 藍灣廣場好大程度係輸在「人和」。點解咁講呢? 我舉幾個例子：

 

（1）斬腳趾避沙蟲。藍灣曾經因為想增加人流, 試過替免費報紙做派發點, 呢條蹺其實都OK架, 不過衰在嗰度嘅 "食蕉" 唔識控制人流, 搞到一鑊泡, 但係商場管理者唔去諗吓點樣改善, 只覺得派免費報係一件苦差事, 後尾索性cut咗佢, 由2010-07-01起, 唔再派咯。

 

（2）白鴿眼。佢地唔認為公屋人係佢地嘅Target Customer, 一心想做中產同寫字樓客。為咗派免費報紙, 要招呼公屋客, 有人已經好不情不願, 有件事我最睇唔過眼......話說有幾位聾啞人士, 每朝都會去藍灣輪候免費報紙, 某次, 某 "掃把級的食蕉" 竟然向其中一位女子呼喝：「啞妹, 你乜乜乜...」, 聽到後, 我心頭一酸, 身體有缺憾, 已經咁慘, 佢自己都唔想, 何必再喺傷口上洒鹽呢? 而且, 我覺得呢個稱呼有歧視及侮辱成份囉...

 

（3）大細超。商場搞「商場Show」, 引來一班後生女等偶像, 等侯期間通地坐, 攤到成地野, 整歡迎紙牌, 唔會有 "食蕉" 干涉, 但係等報紙的, 就一定要排排企, 唔准坐, 甚至連手上D餸都要一路拎住, 唔俾擺低。

 

（4）商場管理者只為自己做野方便, 唔理得係咪User Friendly, 連個垃圾桶都收埋, 唔俾人用。

 

商場, 我行過無數間, 柴灣新翠商場都好歡迎公屋客; 金鐘太古廣場及中環國金商場, 高級過藍灣多多聲, 我一樣咁行, 只有在呢個高不成低不就的藍灣廣場, 我卻感受不到應有的尊重。顧客的眼睛是雪光的, 所以個場咪愈做愈.....

 

 

依家呢度冇人坐。以前, 喺派免費報紙時段, 這裡會坐滿人, 商場管理者為咗驅趕佢地, 會特登喺嗰個時候搞清潔, 趕走D人。好啦, 依家冇人嚟, 開心喇~

 

呢度原本有個垃圾桶。大部分商場都會喺洗手間門口擺放垃圾桶, 方便顧客, 藍灣郤反其道而行, 收起咗......究竟佢知唔知乜野叫USER-FRIENDLY架?