誰會珍惜當你還擁有

(from Yahoo Blog)

2013年2月21日下午4:46｜公開｜累積瀏覽 1822

 

報紙日日都有舖頭結業的消息, 大多數人都歸咎於ＸＸ霸權, 鏟走晒佢地嘅集體回憶。甚至連麥當勞某某分店執笠, 都有記者仔/記者妹大做文章。

年長一輩的, 見證著香港由一個小漁港不斷蛻變, 幾經風浪, 隨著環球經濟大起大落, 已培育出一副面對世界轉變時處之泰然的態度。

 

反觀, 年輕的一代自出娘胎便是太平盛世, 受到百般呵護, 習慣「擁有」, 只係少一間麥當勞也會呱呱嘈。一間自己從未幫襯過的食店執笠, 又會趁last day趕去集體回憶。

 

這就是商機了, 仿古食店應運而生, 日日排長龍。老店執笠賴租貴, 難道仿古食店唔使交租嗎?

 

我傾向相信人的潛能是逼出來的, 懂得把握機遇便是贏家。有舊店結業, 也有新店開張,「變幻原是永恒」吖嘛, 只要在擁有時曾經珍惜過, 經已無憾了, 況且, 若果老店唔係執一間少一間, 而係梗有一間喺左近的話, 就顯不出她的珍貴了。

 

與大家分享Link兄贈我的金句,「誰會珍惜當你還擁有, 將要逝去總想挽留......」

 

 

排長龍的仿古食肆, 門前總會有一班追趕懷舊潮的年輕人。(O2攝於2013-02-09筲箕灣東大街)

 

仿古食肆sell懷舊, 生意太好了, 開埋分店添, 咁咪變咗連鎖式經營? 但依然令年輕人趨之若鶩。咦?! 班年輕人咪話唔鍾意連鎖店嘅咩?! (O2攝於2012-11-03銅鑼灣新會道)

 

(網上圖片) 開喺中環威靈頓街都做得住, 好貴租架喎! 人地交得起租你交唔起, 無話可說吧!

 

 

＊＊＊

 

 

跟進：2013-12-11【蘋果日報】南華足球班主羅傑承的中環來佬餐廳，被業主大幅加租四成多，硬食月租100萬元。該餐廳舖位位於中環威靈頓街64至66號裕榮大廈，租用樓面由地下至一樓、二樓及三樓，面積約5,900方呎，原租約月租70萬元，現續租月租約100萬元，呎租約169元，租金加幅逾四成。