財務自由實驗室 #1/10

 實驗進行中...

 

 

「財務自由」係好多人夢寐以求的境界。

 

有人會窮畢生之精力, 去鑽研投資技巧, 又或修煉投資心法, 終極目標正是希望達至財務自由的最高境界。

各位已知, O2在機緣巧合下, 今年初開始咗一個「月供寶盒」project, 每個月會機械性地買入823。事關O2乃天生懶惰豬 (仲要係懶到出汁, 神仙都難救嗰隻), 覺得呢個方法都幾啱自己。

 

某日忽發奇想, O2想將呢個「月供寶盒」project崁入財經專欄作家郝承林先生於2013-03-15發表《從2000元到3000萬之路》一文的概念裡。

 

該概念的最基本要求係「每月2000元」+「耐性」+「自律」, 持之以恆地月供2千蚊, 連供120期, 跟住就蹺埋手等收成。

 

漫漫長路, O2唔敢肯定自己有冇毅力堅持到最尾, 但仍想將自己的「月供寶盒」作為實驗品, 去引證呢條看似so simple的「財務自由之路」。

 

O2仲要豪少少, 以月供5千蚊作基數, 希望在眾blog友咁多對眼睛的監察及督促之下, O2可以完成呢個實驗啦!

 

 

 

 

　補充：

1. 唔好意思, 因為開頭冇諗過會咁玩, 所以第1-5期的金額係1萬蚊, 之後嗰9年幾, O2會月供5千蚊架喇!
2. 呢個實驗同時亦想引證一下O2舊文《我係死窮鬼》以及《幸福滿瀉的公屋人》的論調。假設現時柴灣區一個實用面積2百幾呎的住宅單位, 月租9,000元；而差不多面積的公屋單位, 月租2,000元。兩者相差7,000元, 於是公屋人可以每月儲起5,000元, 累積財富, 而有多嗰2,000元呢, 鍾意點使咪點使囉。
3. 公屋戶有固定居所, 素來都係政治演員的票倉, 將公屋人講到有咁慘得咁慘, 大條道理去爭取乜乜物物, 以增加佢地自己的政治本錢。以O2愚見, 其實私樓租客和劏房戶比公屋戶更慘情, 居無定所, 兩年要續租一次, 跨選區咁搬嚟搬去, 從不是政治演員首選的攏絡對象。