180個親生仔 不如300億近身錢

(from Yahoo Blog)

2012年5月25日下午3:59｜公開｜累積瀏覽 311

 

房署喺7年前放棄咗180個皮黃骨瘦, 營養不良嘅 「親生仔」的撫養權, 一腳伸佢地出街, 換來3百幾億「近身錢」。

親生仔冇咗個親生老母之後, 變成孤兒仔, 惟有自食其力, 自力更新。好彩有人收養, 為呢班孤兒仔補充養份, 更授之以漁, 孤兒仔從此的起心肝做人, 發揮出自己應有的潛能, 依家總算似番個人, 投身社會同"正常人"競爭, 自己搵食。

 

嗰300億「近身錢」已經包括地價 + 建築費 + 商戶租約, 連毛夾屎一齊賣晒, 所以嗰180個孤兒仔已經同佢親生娘親斷絕晒母子關係, 貨銀兩訖, 冇拖冇欠。坊間的所謂民間組織「領匯監察」, 同埋唯恐天下不亂的主流媒體, 以及共產過共產黨的民主派議員, 係咪有D捉錯用神, 有麻鷹唔管, 管雞仔呢?

 

房署就係嗰個多仔婆, 依家仍然不斷有「免地價」的新商場落成, 房署使每一分每一毫都係納稅人嘅血汗錢, 更加須要市民、傳媒、議員的監察!! 如果盧婆婆及一眾議員認為公屋商場係大眾資產嘅話, 咁就應該好好地監察房署, 睇住佢點樣處置呢幾百億賣仔得番嚟嘅近身錢喎。

 

 

「親生娘親」現存700幾億儲備, 今次寬免1個月公屋租金, 會為今個財政年度帶來10億元預算赤字。咁搞法, 好易又乾塘。

 

 

財政年度　　預算赤字

2011/12　　　10億元

2012/13　　　14億元

2015/16　　　31億元